អ្នកគាំទ្រលោកស្រី ប៉ាក ឃៀនហេ ដែលប្រមូលផ្តុំតវ៉ានៅខាងក្រៅតុលាការធម្មនុញ្ញនៅថ្ងៃសុក្រនេះ បានស្លាប់ពីរនាក់តែមិនទាន់ដឹងមូលហេតុច្បាស់លាស់នៅឡើយ។
យោងតាមទីភ្នាក់ងារព័ត៌មានយ៉ុងហាប់ បានឲ្យដឹងថា បុរសអាយុ៧២ឆ្នាំ ត្រូវបានគេឃើញហូរឈាមតាមក្បាលនៅជិតតុលាការធម្មនុញ្ញ ហើយត្រូវគេបញ្ជូនទៅសង្គ្រោះនៅមន្ទីរពេទ្យបន្ទាប់មកក៏ស្លាប់។
ក្នុងពេលប្រមូលផ្តុំក៏មានអ្នកតវ៉ាម្នាក់ទៀតបានស្លាប់ ហើយពេលនេះសមត្ថកិច្ចបន្តស៊ើបអង្កេតនៅមិនដឹងមូលហេតុច្បាស់នៅឡើយទេ។
តុលាការធម្មនុញ្ញ ជាតុលាការកំពូលរបស់កូរ៉េខាងត្បូងនៅព្រឹកនេះ បានប្រកាសបញ្ចប់តួនាទីរបស់លោកស្រីប៉ាក ឃៀនហេ ពីតំណែងប្រធានាធិបតី ដោយចោទថា ជាប់ពាក់ព័ន្ធរឿងអាស្រូវ ពុករលួយ និងរំលោភអំណាចរដ្ឋ។
ក្រោយការប្រកាសសេចក្តីសម្រេចរបស់តុលាការធម្មនុញ្ញ ក្រុមអ្នកគាំទ្រនិង ក្រុមប្រឆាំងលោកស្រីប៉ាក ឃៀនហេ រាប់ម៉ឺននាក់បានចេញមុខតវ៉ានៅលើផ្លូវ៕