យោងតាមសារព័ត៌មាន BBC បានរាយការណ៍ថាប្រទេសអូស្ត្រាលីបានបញ្ជូនក្រុមអ្នកស្វែងរកសិទ្ធិជ្រកកោនមួយក្រុមដែលបានធ្វើដំណើរតាមទូកទៅដល់ដែនដី Cocos របស់ប្រទេសនេះកាលពីសប្ដាហ៍មុននោះ ទៅកាន់ប្រទេសកំណើតរបស់ពួកគេវិញហើយ។
ទូកមួយដែលដឹកមនុស្ស១២នាក់បានចូលជិតដល់កោះ Home ប៉ុន្តែរដ្ឋមន្ត្រីអន្តោប្រវេសន៍អូស្ត្រាលី លោក Peter Dutton បាននិយាយថាអ្នកស្វែងរកសិទ្ធិជ្រកកោនដែលសុទ្ធតែជាជនជាតិស្រីលង្កាទាំង១២នាក់នោះត្រូវបានអាជ្ញាធរអូស្ត្រាលីបញ្ជូនត្រឡប់ទៅវិញកាលពីថ្ងៃទី០៦ខែឧសភាកន្លងមក។
លោកក៏ប្រកាសផងដែរថា អាជ្ញាធរអូស្ត្រាលីបានឃាត់ទូកទឹកជនភៀសខ្លួនចំនួន៣នៅឆ្នាំនេះ ប៉ុន្តែលោកពុំបានផ្ដល់ព័ត៌មានលម្អិតអំពីទូកពីរផ្សេងទៀតនោះឡើយ។
កោះ Cocos គឺជាជួរកោះដាច់ស្រយាលស្ថិតនៅចន្លោះប្រទេសស្រីលង្កានិងឆ្នេរភាគខាងលិចរបស់ដែនដីគោកអូស្ត្រាលី។
សេចក្ដីប្រកាសនេះត្រូវបានធ្វើឡើងកាលពីថ្ងៃចន្ទម្សិលមិញដែលជាថ្ងៃផ្លូវការដំបូងនៃយុទ្ធនាការបោះឆ្នោតសហព័ន្ធអូស្ត្រាលី។
ចំនួនអ្នកស្វែងរកសិទ្ធិជ្រកកោនដែលបានធ្វើដំណើរទៅដល់ប្រទេសអូស្ត្រាលីតាមសមុទ្រនោះបានធ្លាក់ខ្លួនតែលតោលដោយសារតែគោលនយោបាយតឹងរឹងរបស់ប្រទេសនេះក្នុងរយៈពេលប៉ុន្មានឆ្នាំចុងក្រោយ៕ ប្រភព៖ BBC