មេដឹកនាំសហភាពអឺរ៉ុប ព្រួយបារម្ភថា ការបាត់បង់សំឡេងភាគច្រើននៅក្នុងការបោះឆ្នោតសភារបស់នាយករដ្ឋមន្ត្រីអង់គ្លេស អ្នកស្រី ថេរ៉េសា ម៉េយ៍ អាចបង្កឲ្យគម្រោងចាកចេញពីសហភាពអឺរ៉ុបរបស់អង់គ្លេស អាចនឹងបរាជ័យ ដែលការចរចារសម្រាប់ការចាកចេញនេះ គ្រោងចាប់ផ្ដើមនៅខែនេះ ដែលនឹងនាំផ្លូវអង់គ្លេស ឲ្យចាកចេញពីសហភាពអឺរ៉ុបនៅខែមីនា ឆ្នាំ២០១៩ខាងមុខ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
អង់គ្លេសបានរៀបចំការបោះឆ្នោតកាលពីថ្ងៃទី៨ ខែមិថុនានេះ ហើយលទ្ធផលបង្ហាញថា គណបក្សអភិរក្សនិយមរបស់អ្នកស្រី ម៉េយ៍ បានបាត់បង់សំឡេងគាំទ្រយ៉ាងច្រើន។ ការបាត់បង់សំឡេងគាំទ្រដ៏ច្រើនបែបនេះ អាចជះឥទ្ធិពលទៅដល់ការពន្យាពេលជជែកគ្នាអំពីផែនការចាកចេញពីសហភាពអឺរ៉ុបរបស់អង់គ្លេស នៅថ្ងៃទី១៩ ខែមិថុនានេះ។ ប៉ុន្តែ អ្នកស្រី ម៉េយ៍ ថ្លែងថា រដ្ឋាភិបាលថ្មីរបស់អ្នកស្រី នឹងត្រៀមខ្លួនសម្រាប់ការចរចារនៅក្នុងរយៈពេល ១០ថ្ងៃខាងមុខនេះ។
ទោះជាយ៉ាងណា សហភាពអឺរ៉ុបបានព្រមានថា មេដឹកនាំដ៏ទន់ខ្សោយរបស់អង់គ្លេស អាចជាបញ្ហានៅពេលការចរចាចាប់ផ្ដើម។ មេដឹកនាំសហភាពអឺរ៉ុបយល់ថា ដោយសារតែមានដៃគូចរចាទន់ខ្សោយ ហានិភ័យនឹងកើតចេញពីការចរចានោះ៕
