ប្រជាពលរដ្ឋមានជម្លោះដីធ្លីមកពីខេត្តកោះកុងស្នាក់នៅក្នុងវត្តសាមគ្គីរង្សី មានគម្រោងទៅដាក់ញត្តិសុំកិច្ចអន្តរាគមន៍ពីលោក ហ៊ុន សែន នៅព្រឹកនេះ ប៉ុន្តែសមត្ថកិច្ចបានរារាំងមិនឲ្យអ្នកទាំងនោះចេញពីវត្តទេ។
ស្ត្រីម្នាក់ក្នុងចំណោមពលរដ្ឋទាំងនោះអ្នកស្រី ផាវ ញើង ប្រាប់VODថានៅម៉ោង៨ព្រឹកនេះសមត្ថកិច្ចបានរុញច្រានរូបគាត់និងប្រជាពលរដ្ឋផ្សេងទៀតមិនឲ្យចេញរួចពីរបងវត្តនោះទេ។
ប្រជាពលរដ្ឋដែលមានជម្លោះដីធ្លីមកពីស្រុកស្រែអំបិលខេត្តកោះកុងអះអាងថា ជម្លោះដីធ្លីរបស់ពួកគាត់កើតឡើងតាំងពីឆ្នាំ២០០៦មកនៅមិនទាន់មានដំណោះស្រាយនៅឡើយ។ ប្រជាពលរដ្ឋទាំងនេះមកកាន់រាជធានីភ្នំពេញតាំងពីសប្តាហ៍មុន ហើយពួកគេស្នាក់នៅក្នុងវត្តសាមគ្គីរង្សី ដើម្បីស្វែងរកកិច្ចអន្តរាគមន៍ពីលោកនាយករដ្ឋមន្ត្រី ហ៊ុន សែន និងស្ថាប័នផ្សេងៗ៕