ក្រសួងអប់រំបានប្រកាសថា បេក្ខជនជាង ៥ម៉ឺន ៥ពាន់ បានប្រឡងជាប់សញ្ញាបត្រមធ្យមសិក្សាទុតិយភូមិ ឬបាក់ឌុប នៅឆ្នាំ២០១៦នេះ ឬស្មើនឹងជាង ៦២ភាគរយ នៃបេក្ខជនមានវត្តមានសរុប។
នៅទំព័រហ្វេសប៊ុកផ្លូវការរបស់ខ្លួននៅព្រឹកថ្ងៃនេះ ក្រសួងអប់រំ យុវជន និងកីឡា បានប្រកាសថា បេក្ខជនប្រឡងជាប់ក្នុងសម័យប្រឡងឆ្នាំ២០១៦នេះ មានចំនួន ៥៥ ៧៥៣នាក់ ស្មើនឹង ៦២.១៨ភាគរយ នៃបេក្ខជនមានវត្តមានប្រឡងចំនួន ៨៩ ៦៦១នាក់។
ក្រសួងអប់រំ បានបន្ថែមថា បេក្ខជនទទួលបានលំដាប់ពិន្ទុខ្ពស់និទ្ទេស A មានចំនួន ៤០៥នាក់ និទ្ទេស B មានចំនួន ២ ៨០១នាក់ និទ្ទេស C មានចំនួន ៥ ៥៩៥នាក់ និទ្ទេស D មានចំនួន ៨ ៨៣៥នាក់ និងលំដាប់ពិន្ទុមធ្យមនិទ្ទេស E មានចំនួន ៣៨ ១១៧នាក់ នៅទូទាំងប្រទេស។
រាជធានីភ្នំពេញ មានបេក្ខជនប្រឡងជាប់លំដាប់ពិន្ទុខ្ពស់និទ្ទេស A ដល់ទៅ ១៨៣នាក់ និងតាមពីក្រោយដោយខេត្តសៀមរាប មានបេក្ខជននិទ្ទេស A ៣៦នាក់ នៅក្នុងចំណោមខេត្ត-រាជធានីចំនួន ១៩ នៅទូទាំងប្រទេស។
ក្រសួងអប់រំគ្រោងនឹងប្រកាសលទ្ធផលប្រឡងបាក់ឌុបនៅថ្ងៃនេះ នៅរាជធានីភ្នំពេញ និងខេត្តកណ្ដាល និងនៅតាមបណ្ដាខេត្តនៅទូទាំងប្រទេស នៅថ្ងៃបន្ទាប់៕
