រដ្ឋាភិបាលយោធាថៃនៅថ្ងៃអង្គារនេះ បានប្រកាសរៀបចំការបោះឆ្នោតជាសកលនៅខែវិច្ឆិកាឆ្នាំ២០១៨ ប៉ុន្តែនៅមិនទាន់ប្រកាសពីថ្ងៃណាមួយនៅឡើយ។
ប្រមុខរដ្ឋាភិបាល ឬជាប្រធានក្រុមប្រឹក្សាជាតិដើម្បីសន្តិភាពនិងសណ្តាប់ធ្នាប់ ថ្លែងនៅវិមានរដ្ឋាភិបាលក្នុងទីក្រុងបាងកកថា ថ្ងៃទីប៉ុន្មានជាក់លាក់ នឹងប្រកាសនៅក្នុងខែមិថុនាឆ្នាំ២០១៨។ កន្លងមករដ្ឋាភិបាលប្រកាសពន្យារពេលបោះឆ្នោតដោយបញ្ជាក់មូលហេតុថា បារម្ភពីបញ្ហានៃការផ្លាស់ប្តូររដ្ឋធម្មនុញ្ញ និង សន្តិសុខ។ នេះបើតាមទីភ្នាក់ងារព័ត៌មានរ៉យទ័រ។
លោក ប្រាយុទ្ធ ចាន់អូចា មេដឹកនាំយោធា បានធ្វើរដ្ឋប្រហារទម្លាក់រដ្ឋាភិបាលស៊ីវិល ដឹកនាំដោយលោកស្រី យីង ឡាក់ កាលពីខែឧសភាឆ្នាំ២០១៤ បន្ទាប់ពីប្រទេសនេះមានវិបត្តិនយោបាយ៕
