ការវាយប្រហារតាមផ្លូវអាកាសពីសំណាក់អ៊ីស្រាអ៊ែលទៅលើមូលដ្ឋានយោធាពួកហាម៉ាស់នៅតំបន់កាហ្សា បានសម្លាប់មនុស្ស ២នាក់ កាលពីថ្ងៃម្សិលមិញនេះ។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP ដែលបានដកស្រង់សម្ដីមន្ត្រីសុខាភិបាលនៃរបបគ្រប់គ្រងដែនដីប៉ាឡេស្ទីន។
AFP បានចុះផ្សាយបន្តថា ការវាយប្រហារទៅលើមូលដ្ឋានពួកហាម៉ាស់នៅភាគកណ្ដាលនៃតំបន់កាហ្សាស្ត្រីប បានកើតឡើងចំពេលមានការតវ៉ាទូទាំងដែនដីប៉ាឡេស្ទីន ប្រឆាំងទៅនឹងប្រធានាធិបតីអាមេរិក លោក ដូណាល់ ត្រាំ ដែលបានសម្រេចទទួលស្គាល់ទីក្រុងយេរូសាឡឹម ជារដ្ឋធានីរបស់ប្រទេសអ៊ីស្រាអ៊ែល។
ក្រសួងសុខាភិបាលរបស់ក្រុមហាម៉ាស់នៅតំបន់កាហ្សា បាននិយាយថា សពបុរសពីរនាក់ ត្រូវបានគេកកាយយកបាន ក្រោយពីការវាយប្រហារតាមផ្លូវអាកាសទៅលើមូលដ្ឋានយោធាពួកហាម៉ាស់ នៅភាគកណ្ដាលនៃតំបន់កាហ្សាស្ត្រីប។
ទោះជាយ៉ាងណា មិនមានការបញ្ជាក់ថា បុរសពីរនាក់ដែលត្រូវបានសម្លាប់នោះ ជាសមាជិកក្រុមហាម៉ាស់ ឬយ៉ាងណានោះទេ៕
