មេដឹកនាំបក្សប្រឆាំង លោក សម រង្ស៊ី បានប្រកាសលាលែងពីតំណែងជាប្រធានគណបក្សសង្រ្គោះជាតិ នៅរសៀលថ្ងៃនេះ តែជាង១០ថ្ងៃក្រោយពីលោកនាយករដ្ឋមន្ត្រី ហ៊ុន សែន បានជំរុញទៅរដ្ឋសភា ឲ្យពិចារណាកែប្រែមាត្រាមួយចំនួននៃច្បាប់គណបក្សនយោបាយ ដែលជាការប៉ុនប៉ងដើម្បីរាំងខ្ទប់ផ្លូវនយោបាយរបស់មេដឹកនាំបក្សប្រឆាំងរូបនេះ។
ក្នុងលិខិតផ្ញើទីក្រុងប៉ារីសទៅគណៈកម្មាធិការអចិន្ត្រៃយ៍ និងគណៈកម្មាធិការនាយកគណបក្សសង្គ្រោះជាតិ នៅរសៀលថ្ងៃនេះ លោក សម រង្ស៊ី បានប្រាប់ថា លោកលាលែងពីតំណែងជាប្រធានគណបក្ស និងពីសមាជិកភាពគណបក្សសង្គ្រោះជាតិ ចាប់ពីថ្ងៃនេះតទៅ។
តំណាងរាស្ត្រគណបក្សសង្គ្រោះជាតិ លោក អេង ឆៃអ៊ាង បានប្រាប់វីអូឌីនៅល្ងាចនេះថា លោក សម រង្ស៊ី ពិតជាបានដាក់លិខិតលាលែងពីតំណែងជាប្រធានគណបក្សប្រឆាំងពិតប្រាកដមែន។
ជុំវិញមូលហេតុជាក់លាក់នៃការលាលែងពីតំណែងរបស់លោក សម រង្ស៊ី នោះ លោក អេង ឆៃអ៊ាង ពុំបានដឹងនោះឡើយ ហើយបានជំរុញឲ្យសួរទៅលោក សម រង្ស៊ី ផ្ទាល់តែម្ដង។
ប៉ុន្តែ ក្នុងលិខិតលាលែងនោះ លោក សម រង្ស៊ី ដែលកំពុងរស់នៅនិរទេសខ្លួននៅឯបរទេសនោះ គ្រាន់តែប្រាប់ថា ដោយសារមូលហេតុផ្ទាល់ខ្លួន។
ទោះជាយ៉ាងណា ការលាលែងរបស់លោក សម រង្ស៊ី នេះ ត្រូវបានគេមើលឃើញថា កើតឡើង១១ថ្ងៃក្រោយពីលោកនាយករដ្ឋមន្ត្រី ហ៊ុន សែន បានជំរុញទៅសភាឲ្យកែប្រែមាត្រាខ្លះនៃច្បាប់គណបក្សនយោបាយ ដោយថា ដើម្បីកុំឲ្យមេបក្សដែលត្រូវបានតុលាការកាត់ទោសឲ្យមានទោសនោះ អាចឈរធ្វើជាប្រធានបក្សតទៅទៀត។
ការស្នើរបស់លោកនាយករដ្ឋមន្ត្រី ហ៊ុន សែន ឲ្យកែប្រែមាត្រាខ្លះក្នុងច្បាប់គណបក្សនយោបាយនេះ ត្រូវបានគេជឿថា គឺជាការប៉ុនប៉ងថ្មីបំផុតរបស់គណបក្សកាន់អំណាច ដើម្បីបិទផ្លូវនយោបាយរបស់លោក សម រង្ស៊ី ខណៈដែលកម្ពុជាគ្រោងនឹងរៀបចំការបោះឆ្នោតក្រុមប្រឹក្សាឃុំសង្កាត់នៅក្នុងឆ្នាំ២០១៧នេះ និងការបោះឆ្នោតជាតិនៅឆ្នាំ២០១៨ខាងមុខ៕