ផ្ទុយពីតារាល្បីភាគច្រើនដែលសម្រុកទទួលការងារដើម្បីកើបប្រាក់និងដើម្បីរក្សាភាពលេចធ្លោក្នុងអំឡុង៣ថ្ងៃចូលឆ្នាំ លោក ចែម ចាន់ដារ៉ា ហៅពែកមី បានប្រកាសដោយមុតមាំថាអត់ទទួលការងារទាំងអស់នៅអំឡុងបុណ្យចូលឆ្នាំ។ ក្នុងនោះលោកក៏អះអាងថា នឹងចំណាយលុយធ្វើបុណ្យចែកទាន រៀបចំកម្មវិធីរាំច្រៀងជាច្រើនដើម្បីឲ្យអ្នកស្រុកនៅខេត្តស្វាយរៀងបានសប្បាយទាំង៣ថ្ងៃក្នុងថ្ងៃចូលឆ្នាំ។
លោកបានថ្លែងប្រាប់VOD ថាចាប់ពីថ្ងៃទី១២ដល់ថ្ងៃទី១៦ លោកអត់មានទទួលការងារនោះទេ បើទោះជា៣ថ្ងៃនោះតារាល្បីៗភាគច្រើន និងក្រុមកំប្លែងក្នុងវង់របស់លោកសុទ្ធតែបានទទួលចេញច្រៀង និងដើរកំប្លែងតាមខេត្ត ជាពិសេសគឺទៅកម្មវិធីអង្គរសង្ក្រាន្តជាដើម។ លោកនិយាយថា៖ “ចូលឆ្នាំហ្នឹងគេហៅច្រើន(កម្មវិធី) ប៉ុន្តែអត់ទទួលទេ ព្រោះចង់ទៅធ្វើបុណ្យទៅធ្វើកម្មវិធីសប្បាយៗអីនៅស្រុកកំណើតម្ដង ខែបុណ្យខែទានអញ្ចឹងសុំទៅធ្វើអីឲ្យបងប្អូន(អ្នកស្រុក) យើងគាត់បានសប្បាយវិញវាល្អជាង!”។ កម្មវិធីដែលលោកប្រកាសធ្វើពេញរយៈពេល៣ថ្ងៃចូលឆ្នាំនោះ រួមមានកម្មវិធីសូត្រមន្តលើករាសីរាប់បាត្រ ចែកទានចាស់ៗក្មេងៗនិងកម្មវិធីសប្បាយៗជាច្រើនទៀតឲ្យអ្នកស្រុកអ្នកភូមិរបស់លោកនៅភូមិកំពង់រទេះ ឃុំពពែក ស្រុកស្វាយទាប ខេត្តស្វាយរៀង។ លោកនិយាយថា៖ “ទៅស្រុកលើកហ្នឹងចង់ទៅធ្វើបុណ្យឲ្យពុកឲ្យម៉ែផងនិងចង់ធ្វើកម្មវិធីសប្បាយៗឲ្យបងប្អូនអ្នកភូមិយើងផង អញ្ចឹងបានអត់ទទួលការងារអីទេ!”។
លោកថាបានត្រៀមរួចហើយ នូវវង់តន្ត្រីនិងការចំណាយរៀបចំធ្វើបើកកម្មវិធីរាំច្រៀងផ្សេងទៀត ពេញរយៈពេល៣យប់នៅថ្ងៃបុណ្យចូលឆ្នាំខ្មែរ ដោយមិនមានគម្រោងដើរកម្សាន្តនោះទេ។ លោកនិយាយថា៖ “មើលទៅអត់នាំគ្រួសារដើរលេងអីទេក្ដៅពេក គិតថាធ្វើបុណ្យហើយក៏រៀបចំកម្មវិធីច្រៀងរាំមានលេងល្បែងមានអីឲ្យអ្នកស្រុកបានសប្បាយវិញ ម្យ៉ាងយើងរកលុយកន្លងមកបានច្រើនដែរ អញ្ចឹងយកទៅចំណាយម្ដងទៅ ឲ្យអ្នកស្រុកពុក(នៅស្វាយរៀង)បានចូលរួមផង!”។ លោកថាក្រៅពីធ្វើកម្មវិធីទាំងនោះ ក៏នឹងមានគម្រោងរៀបចំការប្រកួតបាល់ទាត់របស់ក្រុមខ្លួននិងក្រុមដទៃដើម្បីឲ្យបានសាកល្បងសមត្ថភាពគ្នានោះដែរ ដែលការចាត់ចែងក្នុងកម្មវិធីប្រកួតទាំងអស់គឺលោកអ្នកចាត់ចែងចំណាយ។ លោកនិយាយថា៖ “កន្លងមកខ្ញុំបានប្រមូលក្មេងៗរៀបចំជាក្រុមបាល់ទាត់មួយ អញ្ចឹងទៅចូលឆ្នាំហ្នឹងក្រៅពីធ្វើបុណ្យចែកអំណោយ និងបង្កើតកម្មវិធីរាំរែកសប្បាយជាដើម ខ្ញុំនិងក្រុមបាល់ទាត់ខ្ញុំនឹងមានការប្រកួតអីនៅស្រុកនឹងដែរ ព្រោះឮថាមានក្រុមផ្សេងគាត់ចង់លេងជាមួយ! អញ្ចឹង៣ថ្ងៃហ្នឹងប្រហែលចំណាយលុយគួរសមដែរ ព្រោះខ្ញុំត្រៀមធ្វើបុណ្យឲ្យពុកម៉ែផង ចែកទានឲ្យចាស់ៗក្មេងអីផង និងធ្វើធ្វើកម្មវិធីសប្បាយៗកំប៉ុកកំប៉ុកផង!”។
ពាក់ព័ន្ធនឹងបញ្ហាដាក់បម្រាមរបស់ក្រសួងវប្បធម៌ចំពោះបទចម្រៀងក្រោមចំណងជើងថា«អាម៉ុមប៉ុមពីត»របស់លោក មិនឲ្យចាក់ផ្សាយនៅលើកញ្ចក់ទូរទស្សន៍និងវិទ្យុនោះវិញ លោកថាមិនមានបញ្ហាចោទនោះទេ ដោយសារតែបទនោះមិនមែនជាស្នាដៃនិពន្ធរបស់លោកនិងសម្អាងថាមានបទច្រើនទៀតដែលមានអ្នកស្ដាប់ចូលចិត្តនៅលើទីផ្សារ។ លោកនិយាយថា៖ “បទហ្នឹងប្អូនសោម ដូរ៉េ គាត់និពន្ធឲ្យខ្ញុំច្រៀង មុនពេលថតដូចជាមានការពិភាក្សាច្រើនដែរនៅថោន ហើយមកពីគាត់ថាមិនអីទើបខ្ញុំច្រៀងហ្នឹង!”។ យ៉ាងណាក៏ដោយលោកថាបទចម្រៀង«អាម៉ុមប៉ុមពីត»នេះ នៅតែឮគេចាក់តាមភូមិតាមស្រុកជាធម្មតានោះទេ បើទោះជាមានបម្រាមមិនឲ្យដាក់លក់ និងមិនឲ្យចាក់ផ្សាយតាមកញ្ចក់ទូរទស្សន៍និងវិទ្យុ។ លោកថាបន្ទាប់ពីបានទទួលបម្រាមនេះនេះ លោកក្នុងនាមជាអ្នកនិពន្ធបទចម្រៀងនៅផលិតកម្មថោននោះដែរ នឹងបង្កើនការប្រយ័ត្នប្រយែងសម្រាប់ការនិពន្ធខ្លឹមសារ និងអត្ថន័យចម្រៀង ដើម្បីកុំឲ្យមានការរិះគន់។ លោកនិយាយថា៖ “លិខិតបម្រាមហ្នឹងខ្ញុំអត់ទាន់ឃើញទេគឺឮតែគេប្រាប់ ប៉ុន្តែតាមានរឿងអញ្ចឹងដាច់ខាតត្រូវតែប្រយ័ត្ន ព្រោះបទខ្ញុំនិពន្ធកន្លងមកដូចជាបទអាប៉ូយ និងបទចង់បានប្រពន្ធដល់ហើយអីជាដើម គឺសុទ្ធតែប្រយ័ត្នហើយមានបងប្អូនគាត់គាំទ្រច្រើន!”៕
