ក្រុមអ្នកធ្វើដំណើរមួយចំនួន បានត្អូញត្អែរពីការដំឡើងថ្លៃសេវារថយន្តឈ្នួលខុសប្រក្រតី ឬខុសពីថ្ងៃធម្មតាប្រមាណ១៥០០០ រៀល នៅមុនបុណ្យចូលឆ្នាំប្រពៃណីយខ្មែរ បើទោះជារដ្ឋាភិបាលអំពាវនាវកុំឲ្យឡើងថ្លៃក៏ដោយ។
ដើរចេញពីកន្លែងលក់សំបុត្រនៅក្រុមហ៊ុនដឹកអ្នកដំណើរ ខេ.អេស.អូ នៅម្តុំផ្សារដើមគ លោក អ៊ុល ថាន បានរៀបរាប់ប្រាប់អ្នកសារព័ត៌មាននៅថ្ងៃទី១១ ខែមេសានេះថា គាត់ជិះរថយន្តឈ្នួលពីភ្នំពេញទៅខេត្តសៀមរាប មួយនាក់តម្លៃ៤០ ០០០រៀល ខណៈថ្ងៃធម្មតា៣០០០០រៀលតែប៉ុណ្ណោះ។ លោកអះអាងថា ដើមចមដែលនាំឲ្យគាត់សម្រេចចិត្តជិះទៅស្រុក កំណើត ដោយសារគ្មានជម្រើស។
លោកអះអាងថា៖ «ពីរបីថ្ងៃមុនជិះតែ៣ម៉ឺនរៀល…ឥឡូវ៤ម៉ឺនរៀល យើងត្រូវតែទិញ ឡើងថ្លៃក៏យើងត្រូវតែទិញដែរ ត្រូវតែទៅស្រុកកំណើត»។
អ្នកធ្វើដំណើរតាមក្រុមហ៊ុន កាពីតូល កញ្ញា ជិន ស្រីស្រស់ បាននិយាយទាំងទឹកមុខមុតមាំថា ថ្ងៃធម្មតាធ្វើដំណើរពីភ្នំពេញ ទៅសៀមរាប ថ្ងៃធម្មតា៣០០០០រៀល ប៉ុន្តែកញ្ញាថានៅថ្ងៃនេះ ក្រុមហ៊ុនដំឡើងថ្លៃសំបុត្រមួយលើស៥០០០ រៀល ករណីនេះធ្វើឲ្យប៉ះពាល់ដល់អារម្មណ៍និងខាតពេលវេលាពួកគាត់។
កញ្ញាអះអាងថា«ពួកខ្ញុំកក់សំបុត្រ៣ មកទិញដាក់លុយតម្រូវ៣០០០០រៀល ពួកខ្ញុំអត់បានយកលុយមកលើសទេ ពេលទិញ៣០០០០រៀល យកលុយតែ៩០០០០រៀលមកទេ តារាងលើហ្នឹងគេដាក់៣០០០០រៀលដដែល នៅពេលចូលទិញ៣៥០០០រៀល ខ្វះ១៥០០០រៀល ពួកខ្ញុំត្រូវជិះទៅមួយបកទៀត ទៅយកលុយទៀត ដាក់ចឹងទៅបានប្រយោជន៍អី បើគាត់ដាក់មួយដងឲ្យអស់ទៅ ដាក់តែមួយដងទៅរួចហើយ»។
អ្នកធ្វើដំណើរតាមក្រុមហ៊ុន សូរិយា អ្នកនាង ភាន់ សិលា បានអះអាងថា សំបុត្រធ្វើដំណើរមុនចូលឆ្នាំខ្មែរនេះក្នុងមួយនាក់៤០០០០រៀល ខណៈថ្ងៃធម្មតា២៥០០០រៀល ពោលលើស១៥០០០រៀល។ ករណីនេះអ្នកនាងអំពាវនាវទៅម្ចាស់ក្រុមហ៊ុនឲ្យឈប់ដំឡើងថ្លៃ ដោយថាប៉ះពាល់ដល់ជីវភាពអ្នកក្រីក្រ។
អ្នកនាងអំពាវនាវថា«ចង់ឲ្យយកតម្លៃដូចដើម ដើម្បីឲ្យខ្ញុំសល់លុយខ្លះ ព្រោះអីធ្វើការអត់ហើយ មកដល់លុយអស់ហើយ ទៅដល់ផ្ទះទៀតយ៉ាប់»។
លោកនាយករដ្ឋមន្ត្រី ហ៊ុន សែន ក្នុងពិធីជួបកម្មករកាលពីថ្ងៃទី២៨មីនា ដោយអំពាវនាវ ដូចឆ្នាំមុនៗដែរ កុំឲ្យម្ចាស់រថយន្តដំឡើងថ្លៃ សំបុត្រ នៅរដូវចូលឆ្នាំដែលជិតមកដល់នេះ ដោយថាដើម្បីជួយកាត់បន្ថយការចំណាយ ដល់អ្នកដែលទៅលេងស្រុកកំណើត ដើម្បីអបអរពិធីបុណ្យជាតិមួយនេះ។
ទោះជាបែបនះក្តី ភ្លាមៗ VOD មិនអាចសុំការបំភ្លឺពីបុគ្គលិកនៅក្រុមហ៊ុនសូរិយាដឹកអ្នកដំណើរ កាពីតូល ក្រុមហ៊ុន ក្រុមហ៊ុនពន្លឺអង្គរខ្មែរបានទេ ដោយនេះជាបញ្ជារបស់អ្នកថ្នាក់លើ។
ដោយឡែក បុគ្គលិកនៅក្រុមហ៊ុន ខេ.អេស.អូ លោក ពេជ្យ អេមឈាង បានអះអាងថា ការឡើងថ្លៃពេលចូលឆ្នាំបន្តិចបន្តួចនេះសមរម្យហើយ។
លោកលើកឡើថា«ធម្មតាទេ ខែហ្នឹងវាឡើង៤០០០រៀលទៅ៥០០០រៀលវាសមរម្យហើយ យើងមិនអាចហ៊ានឲ្យឡើងច្រើនទេ វាឡើងតែ៥០០០រៀល វាសមរម្យហើយ»។
លោក សន ជ័យ ផ្តល់ជាអនុសាសន៍ថា ដើម្បីដោះស្រាយបញ្ហានេះ ឲ្យមានប្រសិទ្ធិភាពរដ្ឋាភិបាលត្រូវបញ្ចេញរថយន្តក្រុងឲ្យបានច្រើនមុននិងក្រោយចូលឆ្នាំដើម្បីដឹកអ្នកដំណើរទៅតាមខេត្តនានា ទើបទទួលបានផលវិជ្ជមាន។
លោកមានប្រសាសន៍ថា៖ «»។
នៅឆ្នាំនេះ លោកនាយករដ្ឋមន្ត្រីហ៊ុន សែន បានបញ្ជាឲ្យដាក់រថយន្តក្រុងរបស់រដ្ឋចំនួន៦០គ្រឿងសម្រាប់ដឹកជញ្ជូនពលរដ្ឋក្នុងឱកាសចូលឆ្នាំដោយឥតបង់ថ្លៃ ហើយលោកថា បើក្រុមហ៊ុននៅតែបន្តដំឡើងថ្លៃទៀតលោកនឹងពិចារណាដាក់រថយន្តរបស់រដ្ឋកាន់តែច្រើនទៀត នៅឆ្នាំក្រោយៗ៕