អ្នកមានជម្លោះដីធ្លីនៅ ស្រុករមាសហែក ខេត្តស្វាយរៀង អះអាងថា អាជ្ញាធរបានព្រមានពួកគេឲ្យឈប់តវ៉ាការពារដីជិត១០០០ហិចតាដែលពួកគេកំពុងបង្កបង្កើនផល ដោយថាបើមិនដូចនេះទេ អាជ្ញាធរនឹងដាក់ពាក្យប្តឹងករណីនេះទៅតុលាការ។
កាលថ្ងៃទី២៨ ខែមេសា ឆ្នាំ២០១៧ ប្រជាពលរដ្ឋប្រមាណ១០០នាក់ មកពីស្រុកចំនួនពីរនៅក្នុងខេត្តស្វាយរៀង បាន ធ្វើយុទ្ធនាការដាក់ញត្តិនៅថ្នាក់ជាតិក្នុងរាជធានីភ្នំពេញ ជំរុញឲ្យរដ្ឋាភិបាល អន្តរាគមន៍ទប់ស្កាត់កុំឲ្យក្រុមហ៊ុន រំលោភយកដីពួកគេជិត១០០០ហិចតា។
ញត្តិរបស់អ្នកភូមិបានចោទថា ក្រុមហ៊ុនចំនួនពីរ បានមកឈួសឆាយយកដីរបស់ពួកគេ ដែលធ្លាប់អាស្រ័យផលច្រើនឆ្នាំមកហើយនោះ ដោយគ្មានការទប់ស្កាត់ពីអាជ្ញាធរដែនដី។
តំណាងពលរដ្ឋម្នាក់ កញ្ញា ខៀវ សារ៉ុន ប្រាប់វីអូឌី នៅថ្ងៃនេះថា អាជ្ញាធរស្រុក បានហៅពួកគាត់ទៅជួបនៅនគរបាលប៉ូស្តិ៍អំពិល ក្នុងឃុំអំពិល ស្រុករមៀហែក ហើយចោទពួកគាត់ថា បានដកបង្គោលក្រុមហ៊ុននិងបានគំរាមពួកគាត់ឲ្យឈប់តវ៉ានិងដើរដាក់ញត្តិទាមទារយកដីទៀតនោះទៀត ដោយថា ដីនោះជារបស់ក្រុមហ៊ុន។
កញ្ញាថា «គាត់ថាឲ្យឈប់ទៅធ្វើនៅលើកដីនោះទៅ យ៉ាងណាក៏គេអត់ឲ្យ ហើយបើសិនជាយើងនៅតែតវ៉ារឿងដីនឹងទៀត យើងស៊ូមិនរួចពីឡើងតុលាការទាំងអស់គ្នាទេ ថាគាត់ខ្មែរដូចគ្នាអត់ចង់ឲ្យប្រជាពលរដ្ឋឡើងតុលាការ ហើយពួកខ្ញុំថា បើពួកខ្ញុំមិនខុសឡើងតុលាការក៏មិនខ្លាចដែរ»។
តំណាងពលរដ្ឋម្នាក់ទៀតអ្នកស្រី ម៉ង ស៊ីណា លើកឡើងថា ពួកគាត់នៅតែតវ៉ា ដើម្បីទាមទារយកដីរបស់ពួកគាត់មកវិញ បើទោះបីមានការគំរាមកំហែងថា នឹងចាប់ពួកគាត់ក៏ដោយ។
អ្នកស្រី «ខ្ញុំអត់ស្លុតអត់ភ័យខ្លាចទេ ទាល់ណាតែគេចាប់ខ្ញុំដាក់ខ្នោះដូចដែលពាក្យព្រមាននោះក្រែងខ្ញុំតក់ស្លុត បើដូចសព្វថ្ងៃខ្ញុំមិនតក់ស្លុតទេខាងរដ្ឋគេនៅនេះច្រើនណាស់ គេបើហ៊ានតែខ្ញុំធ្វើគេថា គេហ៊ានចាប់ខ្នោះដល់ពេលចឹងខ្ញុំថាខ្ញុំមិនតក់ស្លុតទេបើអស់លោកចង់ចាប់ខ្ញុំក៏ចាប់ទៅ»។
អ្នកស្រីបន្តថា កាលពីថ្ងៃទី២៣មីនាឆ្នាំ២០១៧ មានក្រុមហ៊ុនមួយមិនស្គាល់ឈ្មោះ បាន អះអាងថា ខ្លួនទទួល បានសិទ្ធិវិនិយោគពីរដ្ឋាភិបាល បានដាក់គ្រឿងចក្រឈួសឆាយ និងបង្កឲ្យប៉ះពាល់ដីពលរដ្ឋ៤៤០គ្រួសារ ដែលមានផ្ទៃសរុប៦៧០ហិចតា។
វីអូឌីមិនអាចទាក់ទងអ៌ភិបាលស្រុករមាសហែកបានទេ ប៉ុន្តែអភិបាលរងស្រុក លោក ព្រំ សារិន អះអាងថាលោកមិនបានដឹងរឿងនេះ។
មន្ត្រីស៊ើបអង្កេតអង្កការលីកាដូលប្រចាំខេត្តស្វាយរៀង លោក មុំ លីដា ចាត់ទុកព្រមាននេះថា ជាការបំបិទសិទ្ធិសេរីភាពប្រជាពលរដ្ឋមិនឲ្យធ្វើការតវ៉ា។ លោកជំរុញឲ្យអាជ្ញាធរគួរតែហៅពលរដ្ឋ ឲ្យជួបជាមួយក្រុមហ៊ុន ស្វែងរកដំណោះស្រាយដោយតម្លាភាព ជាជាងគំារាមប្តឹងពលរដ្ឋហើយមិនផ្តល់ដំណោះស្រាយនោះ៕