គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. គ្រោងនឹងរាប់សន្លឹកឆ្នោតឡើងវិញ នៅតាមការិយាល័យចំនួន ២៣ ស្ថិតក្នុងឃុំដូង ខេត្តស្វាយរៀង នៅសប្ដាហ៍ក្រោយនេះ ទៅតាមបណ្ដឹងរបស់គណបក្សធំៗទាំងពីរ។
ក្នុងសេចក្ដីប្រកាសព័ត៌មានកាលពីថ្ងៃម្សិលមិញនេះ គ.ជ.ប. បានប្រកាសថា ខ្លួនសម្រេចរាប់សន្លឹកឆ្នោតឡើងវិញនៅ ២៣ការិយាល័យ នៅឃុំដូង ស្រុករមាសហែក នៅថ្ងៃទី១២ ខែមិថុនានេះ។
លោក ហង្ស ពុទ្ធា អ្នកនាំពាក្យ គ.ជ.ប. បានប្រាប់វីអូឌីនៅព្រឹកថ្ងៃនេះថា គ.ជ.ប. គ្រោងនឹងរាប់សន្លឹកឆ្នោតឡើងវិញនៅតាមការិយាល័យនានា ស្ថិតក្នុងឃុំខាងលើ បន្ទាប់ពី គ.ជ.ប. បានទទួលបណ្ដឹងទាំងពីគណបក្សប្រជាជនកម្ពុជា និងគណបក្សសង្គ្រោះជាតិ។
លោកមានប្រសាសន៍ថា៖ “អ្នកប្តឹងបានប្តឹងទៅគណៈកម្មាធិការរៀបចំការបោះឆ្នោត បន្ទាប់មក នៅពេលដែលដោះស្រាយមិនបានសះជា គឺប្តឹងមកគណៈកម្មាធិការរាជធានីខេត្តរៀបចំការបោះឆ្នោត ហើយនៅតែមិនសះជាគឺប្តឹងមក គ.ជ.បនេះតែម្តង។ អីចឹងក្នុងតួនាទីនេះ គ.ជ.ប. ពិនិត្យទៅឃើញថា មានការឆកល្វែងខ្លះក្នុងការដោះស្រាយបណ្តឹង ហើយគ.ជ.បក៏រៀបចំដោះស្រាយបណ្តឹងដោយធ្វើការរាប់ឡើងវិញនៅក្នុងឃុំដូងទាំងមូលហ្នឹង……មានករណីប្តឹងទាំងសងខាង [គណបក្សប្រជាជន និងគណបក្សសង្គ្រោះជាតិ]”។
លទ្ធផលបណ្ដោះអាសន្ននៃការបោះឆ្នោតក្រុមប្រឹក្សាឃុំ-សង្កាត់ដែលផ្សាយដោយ គ.ជ.ប. បង្ហាញថា គណបក្សសង្គ្រោះជាតិបានឈ្នះនៅឃុំដូង ជាមួយសំឡេងនាំមុខគណបក្សប្រជាជនកម្ពុជាត្រឹមតែ ៣សំឡេងតែប៉ុណ្ណោះ ដោយបក្សប្រឆាំងទទួលបានសំឡេងឆ្នោតគាំទ្រ ២៥៩៩សំឡេង៕
