ក្រុមមន្ត្រីអះអាងថា កងកម្លាំងពិសេសរបស់អាមេរិក បានចូលរួមប្រយុទ្ធជាមួយកងទ័ពហ្វីលីពីន កម្ទេចពួកបះបោរដែលបានកាន់កាប់ទីក្រុងម៉ារ៉ាវី ស្ថិតនៅភាគខាងត្បូងប្រទេសហ្វីលីពីន ខណៈដែលកងទ័ពហ្វីលីពីនកំពុងនាំមុខ ហើយកងទ័ពជើងទឹក ១៣នាក់ ត្រូវបានសម្លាប់នៅក្នុងការវាយប្រហារនោះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
កងទ័ពហ្វីលីពីន និយាយថា អាមេរិកបានផ្ដល់ជំនួយបច្ចេកទេស ដើម្បីបញ្ចប់ការកាន់កាប់ទីក្រុងម៉ារ៉ាវីរបស់ពួកបះបោរ ដែលមានទំនាក់ទំនងនឹងពួកភេរវកម្មរដ្ឋឥស្លាម។ ការប្រយុទ្ធនេះបានឈានចូលដល់សប្ដាហ៍ទីបីហើយ។
ស្ថានទូតអាមេរិក បានបញ្ជាក់ថា ខ្លួនពិតជាបានផ្ដល់ការគាំទ្រ ទៅតាមសំណើរបស់រដ្ឋាភិបាលហ្វីលីពីន ប៉ុន្តែ មិនបានផ្ដល់ព័ត៌មានលម្អិតនោះឡើយ។ ប្រព័ន្ធផ្សព្វផ្សាយក្នុងស្រុក បានផ្សាយថា យន្តហោះចម្បាំងអាមេរិក ត្រូវបានគេឃើញហោះហើរនៅលើទីក្រុងម៉ារ៉ាវី។
កិច្ចសហប្រតិបត្តិការរវាងសម្ព័ន្ធមិត្តចាស់វស្សានេះ មានសារៈសំខាន់ណាស់ ដោយសារតែប្រធានាធិបតីហ្វីលីពីន លោក រ៉ូទ្រីហ្កូ ឌូទើតេ តែងតែប្រកាន់ជំហរប្រឆាំងនឹងអាមេរិក ហើយប្ដេជ្ញាច្រានចោលការផ្ដល់ជំនួយជាអ្នកបណ្ដុះបណ្ដាល និងទីប្រឹក្សាយោធារបស់អាមេរិក៕
