នគរបាលបានឲ្យដឹងថា រថយន្តដឹកជ្រូកពីប្រទេសវៀតណាមមួយគ្រឿងតាមបណ្តោយផ្លូវជាតិលេខ៨អា ហើយក្រឡាប់ទៅបុកផ្ទះប្រជាពលរដ្ឋនៅត្រង់ចំណុច ភូមិប្រមូលដុំ ឃុំស្មោងខាងជើង ស្រុកកំចាយមារ ខេត្តព្រៃវែង។
អធិការស្រុកកំចាយមារ លោក ស៊ីវ សុខុម បានឲ្យដឹងថា ហេតុការណ៍នោះកើតឡើងកាលពីម្សិលមិញ នៅម៉ោង១២ និង ៤០នាទី បានបណ្តាលឲ្យខូចខាតទ្រព្យសម្បត្តិមួយចំនួន និងមានអ្នករងរបួសម្នាក់។ លោកឲ្យបានដឹងទៀតថា ក្រោយកើតហេតុជ្រូកត្រូវក្រុមហ៊ុនដឹកជញ្ជូនបន្ត ចំណែកការផ្តល់សំណងដល់ពលរដ្ឋនឹងមានការដោះស្រាយនៅថ្ងៃស្អែក។
លោក ស៊ីវ សុខុម បានឲ្យដឹងទៀតថា រថយន្តនេះដឹកជ្រូកចំនួន១៥០ក្បាលមកពីវៀតណាម ហើយថា ជ្រូកទាំងនោះមានច្បាប់នាំចូលត្រឹមត្រូវ៕
