ស្ថានទូតអូស្ត្រាលីប្រចាំកម្ពុជាប្រកាសថា ការថ្លែងរបស់តំណាងរាស្ត្រនៅរដ្ឋ Victoria ដែលថារបបដឹកនាំនៅកម្ពុជាតិរច្ឆាននោះ មិនមែនតំណាងឲ្យរដ្ឋាភិបាលនោះទេ តែទូតនេះគាំទ្រការបញ្ចេញមតិព្រោះវាជាធាតុសំខាន់នៃការពង្រឹងលទ្ធិប្រជាធិបតេយ្យ។
ក្នុងសេចក្តីថ្លែងការរបស់ស្ថានទូតអូស្ត្រាលីប្រចាំកម្ពុជានៅថ្ងៃទី១០ខែសីហាបានលើកឡើងថា លោក ហុង លីម មិនមែនជាសមាជិករដ្ឋាភិបាលសហព័ន្ធឬសមាជិកសភាសហព័ន្ធទេ។ សេចក្តីថ្លែងការណ៍បន្តថា ការថ្លែងរបស់លោក ហុង លីម រិះគន់របបដឹកនាំកម្ពុជានោះ មិនឆ្លុះបញ្ចាំងជំហរឬតំណាងឲ្យរដ្ឋាភិបាលអូស្ត្រាលីនោះទេ។
ទោះយ៉ាងណាសេចក្តីថ្លែងការណ៍បានបញ្ជាក់ថា ប្រទេសអូស្ត្រាលីមានប្រពៃណីរឹងមាំល្អក្នុងការបញ្ចេញមតិជាសាធារណៈ ហើយថាចំណុចទាំងនេះជាធាតុផ្សំយ៉ាងសំខាន់ក្នុងការពង្រឹងប្រព័ន្ធលទ្ធិប្រជាធិបតេយ្យនៅអូស្ត្រាលី។
កាលពីដើមខែសីហានេះតំណាងរាស្ត្រនៅរដ្ឋ Victoria នៃប្រទេសអូស្ត្រាលី ដែលមានដើមកំណើតជាខ្មែរបានថ្កោលទោសចំពោះឃាតកម្មបាញ់សម្លាប់លោក កែម ឡី ហើយពេលនោះលោកក៏បានហៅរបបដឹកនាំកម្ពុជាបច្ចុប្បន្នថាមានលក្ខណៈតិរច្ឆាន។
ក្រោយការថ្លែងរបស់លោក ហុង លីម រដ្ឋសភាកម្ពុជាបានទាមទារឲ្យសុំទោសជាធារណៈ ក្រោយមកក្រសួងការបរទេសក៏បានប្រកាសដាក់ លោក ហុង លីម ក្នុងបញ្ជីខ្មៅ មិនអនុញ្ញាតឲ្យចូលទឹកដីកម្ពុជា៕
