អង្គការសហប្រតិបត្តិការឥស្លាម កាលពីថ្ងៃម្សិលមិញនេះ បានថ្កោលទោសប្រទេសភូមា ចំពោះ «ទង្វើឃោឃៅប្រព្រឹត្តឡើងជាប្រព័ន្ធ»ប្រឆាំងនឹងជនជាតិភាគតិចមូស្លីមរ៉ូហ៊ីងយ៉ា ហើយបានស្នើទៅភូមា ឲ្យទទួលយកក្រុមឃ្លាំមើលអន្តរជាតិ។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
អង្គការសហប្រជាជាតិ បាននិយាយថា ជនភៀសខ្លួនរ៉ូហ៊ីងយ៉ាជិត ៣សែននាក់ បានរត់ភៀសខ្លួនចូលទៅប្រទេសបង់ក្លាដែស ចាប់តាំងពីពួកបះបោររ៉ូហ៊ីងយ៉ា បានវាយប្រហារទៅលើកម្លាំងសន្តិសុខភូមា នៅរដ្ឋរ៉ាក់ឃីន កាលពីថ្ងៃទី២៥ ខែសីហាកន្លងមកនេះ ដែលជំរុញឲ្យមានការបង្ក្រាបពីកងទ័ពភូមា។
ខណៈដែលមានការបង្ក្រាបទៅលើជនជាតិរ៉ូហ៊ីងយ៉ានោះ អង្គការសហប្រតិបត្តិការឥស្លាមដែលមានសមាជិក ៥៧ប្រទេស បានជួបប្រជុំគ្នានៅទីក្រុងអាស្ទែណា ប្រទេសកាហ្សាក់ស្ថាន ដោយពួកគេបង្កក្ដីបារម្ភយ៉ាងខ្លាំងចំពោះទង្វើឃោឃៅកើតឡើងជាប្រព័ន្ធនាពេលថ្មីៗនេះ ដែលប្រព្រឹត្តឡើងដោយកងកម្លាំងសន្តិសុខភូមា ប្រឆាំងនឹងសហគមន៍រ៉ូហ៊ីងយ៉ា។
ក្រុមនេះបានជំរុញទៅភូមាឲ្យទទួលយកក្រុមត្រួតពិនិត្យរបស់អង្គការសហប្រជាជាតិ ដើម្បីធ្វើការស៊ើបអង្កេតដោយឯករាជ្យ និងពេញលេញ ទៅលើអ្វីដែលត្រូវបានចោទថា ជាការរំលោភសិទ្ធិមនុស្ស និងនាំខ្លួនអ្នកទទួលខុសត្រូវទៅកាត់ទោស។
ប្រធានអង្គការសហប្រតិបត្តិការឥស្លាម ប្រធានាធិបតីតួកគី លោក តាយយីប អឺដូហ្គែន បានបញ្ចេញសំឡេងរិះគន់ខ្លាំងក្លាបំផុតទៅលើគោលនយោបាយប្រឆាំងជនជាតិរ៉ូហ៊ីងយ៉ារបស់ប្រទេសភូមា៕
