អគ្គលេខាធិការសម្ព័ន្ធយោធាណាតូ បាននិយាយនៅថ្ងៃនេះថា កម្មវិធីនុយក្លេអ៊ែរ និងគ្រាប់មីស៊ីលរបស់កូរ៉េខាងជើង បង្ហាញនូវការគំរាមកំហែងដល់ពិភពលោក និងទាមទារឲ្យមានវិធានការជាសកលមួយ។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
នៅក្នុងកិច្ចសម្ភាសមួយជាមួយទូរទស្សន៍ BBC អគ្គលេខាធិការណាតូ លោក Jens Stoltenberg បានបដិសេធផងដែរថា តើការវាយប្រហារលើដែនដីអាមេរិកកោះហ្គាំ អាចនឹងជំរុញឲ្យមានបុព្វហេតុខាងយោធារួមឬយ៉ាងណានោះទេ។
លោក Stoltenberg បានប្រាប់ថា អក្បករិយាគឃ្លើនរបស់កូរ៉េខាងជើង គឺជាការគំរាមកំហែងពិភពលោក ហើយទាមទារឲ្យមានវិធានការជាសកលមួយ ហើយវាក៏រួមបញ្ចូលទាំងអង្គការណាតូផងដែរ។
លោក Stoltenberg បានអំពាវនាវទៅកូរ៉េខាងជើងឲ្យបោះបង់ចោលកម្មវិធីនុយក្លេអ៊ែរ និងគ្រាប់មីស៊ីលរបស់ខ្លួន ហើយបញ្ឈប់ការធ្វើតេស្តសាកល្បងបន្ថែមទៀត ដោយលោកថា ទង្វើនេះជាការរំលោភលើសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ និងជាការគំរាមកំហែងដល់សន្តិផាព និងស្ថេរភាពអន្តរជាតិ៕