របាយការណ៍រដ្ឋាភិបាល បានបង្ហាញថា កម្ពុជានាំចេញអង្ករជិត ៦០ម៉ឺនតោនទៅកាន់ទីផ្សារអន្តរជាតិ ដោយបានកើនឡើងជិត ២០ភាគរយនៅក្នុងរយៈពេល ១១ខែក្នុងឆ្នាំនេះ។
របាយការណ៍របស់លេខាធិការដ្ឋានច្រកចេញចូលតែមួយសម្រាប់ការបំបេញបែបបទនៃការនាំចេញអង្ករ ដែលវីអូឌីទើបទទួលបានថ្ងៃនេះ បានឲ្យដឹងថា ទំហំនៃការនាំចេញអង្ករកម្ពុជា បានកើនឡើងពីចំនួន ៤៧៩,៦៨៩តោននៅឆ្នាំ២០១៦ ទៅដល់ចំនួន ៥៦២,២៣៧តោន ដោយបានកើនឡើង ១៧.២០ភាគរយនៅចន្លោះខែមករាដល់ខែវិច្ឆិកាកន្លងមកនេះ។
របាយការណ៍ដដែល បានឲ្យដឹងទៀតថា កម្ពុជាបាននាំអង្កររទៅកាន់ទីផ្សារអន្តរជាតិជិត ៦០ប្រទេស ហើយប្រទេសដែលទិញអង្ករកម្ពុជាច្រើនជាងគេរួមមាន ប្រទេសចិនទិញចំនួនជាង ១៦ម៉ឺនតោន បារាំងទិញចំនួនជាង ៧ម៉ឺនតោន និងប្រទេសប៉ូឡូញ ទិញចំនួនជាង ៤ម៉ឺនតោន។
ប្រទេសកម្ពុជានាំចេញអង្ករទៅទីផ្សារអន្តរជាតិបានចំនួន ៥៣ម៉ឺនតោននៅឆ្នាំ២០១៥ និងទំហំ ៥៤ម៉ឺនតោននៅឆ្នាំ២០១៦ ដែលធ្វើឲ្យប្រទេសនេះពុំអាចសម្រេចបានតាមគោលដៅនាំអង្ករចេញឲ្យបាន ១លានតោនក្នុងមួយឆ្នាំនៅត្រឹមឆ្នាំ២០១៥កន្លងមក៕