ទីភ្នាក់ងារព័ត៌នមានអន្តរជាតិបានចុះផ្សាយថា កូរ៉េខាងត្បូង ជប៉ុន និងអាមេរិក បានចាប់ផ្ដើមសមយុទ្ធយោធារួមគ្នានៅថ្ងៃនេះ ដើម្បីតាមដានមីស៊ីលបាញ់ចេញពីកូរ៉េខាងជើង ដែលសមយុទ្ធនេះ ត្រូវបានរៀបចំធ្វើឡើងក្រោយពីក្រុងព្យុងយ៉ាងបានបាញ់សាកល្បងគ្រាប់មីស៊ីលរយៈចម្ងាយឆ្ងាយ។
សមយុទ្ធចម្រុះត្រីភាគីនេះ បានកើតឡើងមិនដល់ ២សប្ដាហ៍ផង ក្រោយពីក្រុងព្យុងយ៉ាងបានបាញ់សាកល្បងគ្រាប់មីស៊ីលអន្តរទ្វីប និងបានប្រកាសថា ខ្លួនសម្រេចបានក្លាយខ្លួនជារដ្ឋមាននុយក្លេអ៊ែរ ដែលជំរុញឲ្យមានក្ដីបារម្ភកាន់តែខ្លាំងពីសំណាក់សហគមន៍អន្តរជាតិជុំវិញកម្មវិធីអាវុធរបស់រដ្ឋឯកោមួយនេះ។
ក្រសួងការពារជាតិកូរ៉េខាងត្បូង បាននិយាយថា សមយុទ្ធរយៈពេល ២ថ្ងៃនេះ ចាប់ផ្ដើមធ្វើឡើងនៅក្នុងដែនទឹកស្ថិតនៅជិតឧបទ្វីបកូរ៉េ និងប្រទេសជប៉ុន ប៉ុន្តែ នេះគឺជាសមយុទ្ធរួមគ្នាលើកទី៦ គិតចាប់តាំងពីខែមិថុនាឆ្នាំនេះ។
ទាំងកូរ៉េខាងត្បូង និងជប៉ុន សុទ្ធតែមានសម្ព័ន្ធភាពសន្តិសុខជាមួយអាមេរិក បើទោះបីជាប្រទេសទាំងពីរនេះ មានជម្លោះប្រវត្តិសាស្ត្រ និងជម្លោះទឹកដីជាមួយគ្នាក៏ដោយ៕
