នគរបាលអន្តោប្រវេសន៍របស់សិង្ហបុរីបានឃាត់ខ្លួនជនជាតិឥណ្ឌូនេស៊ីចំនួន៨នាក់នៅច្រកព្រំដែន ដោយសង្ស័យថាពួកគេមានបំណងចូលរួមសកម្មភាពជាមួយពួករដ្ឋឥស្លាម ដែលកំពុងមានមូលដ្ឋាននៅដែនដីស៊ីរីនិង អ៊ីរ៉ាក់។
សារព័ត៌មានChannel News Asia ចុះផ្សាយថា ពលរដ្ឋឥណ្ឌូនេស៊ីទាំង៨នាក់នោះ ត្រូវបានចាប់ខ្លួនពេលដែលពួកគេព្យាយាមចូលក្នុងប្រទេសសិង្ហបុរីនៅម៉ោង១និង៣០នាទី យប់នៅថ្ងៃពុធម្សិលមិញ ហើយសមត្ថកិច្ចពិនិត្យឃើញ រូបភាពក្នុងទូរសព្ទគ្នាគេម្នាក់ក្នុង ចំណោម៨នាក់ ដែលអាចសង្ស័យថា ពួកគេបម្រើការងារឲ្យក្រុមភេរវកម្ម។
អ្នកទាំង៨នាក់ត្រូវនគរបាលសិង្ហបុរីឃាត់ខ្លួន បញ្ជូនទៅឲ្យសមត្ថកិច្ចម៉ាឡេស៊ី ដើម្បីបន្ត នីតិវិធីបញ្ជូនទៅឥណ្ឌូនេស៊ីបន្តទៀត។ សមត្ថកិច្ចឲ្យដឹងថា អ្នកដែលត្រូវឃាត់ខ្លួនទាំងនោះ មានអាយុពី១៦ដល់៣៧ឆ្នាំ។
សមត្ថកិច្ចឥណ្ឌូនេស៊ីថ្លែងថា រូបភាពនៅក្នុងទូរសព្ទដៃទាំងនោះមាន ទង់សម្គាល់របស់ក្រុមIS និង រូបការធ្វើសកម្មភាពបំផ្ទុះមួយចំនួនទៀត។
តាមការចុះផ្សាយរបស់ចាការតាប៉ុស្តិ៍ ឲ្យដឹងថា ចាប់តាំង ពីមានការបង្ក្រាប សកម្មភាព នៃការចូលរួមជាមួយពួកISមក ជនជាតិឥណ្ឌូនេស៊ីចំនួន៨៨នាក់ហើយដែល ត្រូវបានឃាត់ខ្លួនពីបទធ្វើសកម្មភាពចូលរួមជាមួយក្រុមភេរវកម្មនោះ៕
