ប្រធានគណបក្សអំណាចខ្មែរ លោក សួន សេរីរដ្ឋា បានសរសេរលិខិតមួយទៅប្រធានសាលាដំបូងរាជធានីភ្នំពេញ ដោយស្នើសុំការពន្យល់មូលហេតុដែលតុលាការសម្រេចមិនចាត់ការលើបណ្តឹងប្រឆាំងនឹងរដ្ឋមន្រ្តីក្រសួងការបរទេសកម្ពុជា លោក ហោ ណាំហុង។
លិខិតមួយចុះថ្ងៃទី១២កុម្ភៈ លោក សួន សេរីរដ្ឋា បានស្នើសុំប្រធានសាលាដំបូងបញ្ជូនលិខិតរបស់លោកទៅព្រះរាជអាជ្ញារង លោក មាស ច័ន្ទពិសិដ្ឋ ដើម្បីសុំពន្យល់ជាលាយលក្ខណ៍អក្សរពីមូលហេតុនៃការមិនចាត់ការបណ្តឹងនេះ។ លោកបញ្ជាក់ថា៖ “លិខិតជូនដំណឹងពីដីកាតម្កល់រឿងឥតចាត់ការមិនបានបញ្ជាក់ពីសំអាងច្បាប់និងសំអាងហេតុឲ្យច្បាស់លាស់ដែលខ្ញុំមិនអាចទទួលយកបានអំពីការសម្រេចនេះ ហេតុដូច្នេះបានជាខ្ញុំដាក់លិខិតសូមឲ្យពន្យល់ទៅតាមនីតិវិធីច្បាប់”។
នៅក្នុងលិខិតជូនដំណឹងចុះថ្ងៃទី២៩ ខែមករា ផ្ញើជូនលោក សួន សេរីរដ្ឋា ព្រះរាជអាជ្ញារងលោក មាស ច័ន្ទពិសិដ្ឋ ឲ្យដឹងថាការសម្រេចតម្កល់ឥតចាត់ការ។ ទោះយ៉ាងណា នៅក្នុងលិខិតជូនដំណឹងនោះ លោក មិនបានបញ្ជាក់ពីមូលហេតុដែលនាំឲ្យលោកសម្រេចឥតចាត់ការបណ្ដឹងរបស់លោក សួន សេរីរដ្ឋា នោះទេ។ លិខិតដដែលបន្តថា លោក សួន សេរីរដ្ឋា មានសិទ្ធិប្ដឹងឧទ្ធរណ៍នឹងដីកាសម្រេចនេះក្នុងរយៈពេល២ខែ ចាប់ពីថ្ងៃទទួលដំណឹងតទៅ។
ព្រះរាជ្ញារងសាលាដំបូងរាជធានីភ្នំពេញ លោក មាស ច័ន្ទពិសិដ្ឋ ប្រាប់វីអូឌីថាសេចក្តីសម្រេចរបស់តុលាការគឺច្បាប់ហាមមិនឲ្យពន្យល់ជាសាធារណៈនោះទេ វៀរលែងតែសេចក្តីសម្រេចនោះបង្កចលាចលដល់សង្គម ទើបព្រះរាជអាជ្ញាត្រូវចេញមុខពន្យល់និងបកស្រាយ។ ទោះយ៉ាងណាលោកថា លោក សួន សេរីរដ្ឋា អាចឲ្យមេធាវីដាក់ពាក្យទៅតុលាការដើម្បីស្នើសុំចំលងសំណុំរឿងនោះទៅពិនិត្យបាន ដើម្បីបានដឹងពីមូលហេតុនៃការតម្កល់នេះ។
លោកបន្ថែមថា៖ “អាហ្នឹងបើសំណើបើប្រធានគាត់ធ្វើយ៉ាងម៉េចជាសិទ្ធិរបស់លោកប្រធាន(ប្រធានសាលាដំបូងរាជធានីភ្នំពេញ) មិនមែនជាសិទ្ធិរបស់ខ្ញុំទេ បើខ្ញុំគឺអត់មានឲ្យមានការបកស្រាយបំភ្លឺទេ លើកលែងតែសភាពការសន្តិសុខនឹងវាមកពីការលើកឡើងព័ត៌មានមិនពិតអី ខ្ញុំត្រូវចេញបំភ្លឺ តែបើថាអត់មានទេ សេចក្តីសម្រេចអត់មានត្រូវចេញមកស្រាយបំភ្លឺព័ត៌មានអ៊ីចឹងទេ”។
ទោះយ៉ាងណា លោក សួន សេរីរដ្ឋា មានប្រសាសន៍ថាតាមក្រមព្រហ្មទណ្ឌមាត្រា៤១ចែងថាតុលាការ ព្រះរាជអាជ្ញាត្រូវតែពន្យល់ឲ្យច្បាស់លាស់មកដើមបណ្តឹងពីហេតុផលដែលខ្លួនសម្រេចតម្កល់ពាក្យបណ្តឹងណាមួយ។ លោកចាត់ទុកការតម្កល់បណ្តឹងរបស់លោកមិនចាត់ការនេះថាជាការ“កំសាក”របស់តុលាការមិនហ៊ានអនុវត្តច្បាប់លើអ្នកមានអំណាច។
លោកបន្ថែមថា៖ “ខ្ញុំថាមកពីតុលាការហ្នឹងវាជាឈ្នាន់នយោបាយរបស់គណបក្សប្រជាជនកំពុងកាន់អំណាច អ៊ីចឹងទាំងចៅក្រម ទាំងតុលាការគឺ កំសាកអត់ហ៊ានប្រើច្បាប់ហ្នឹងកោះហៅមន្រ្តីគណបក្សប្រជាជនហ្នឹងមកសាកសួរ ហើយអត់ហ៊ានបើកសវនាការកាត់ក្តីទេ…បើសិនជាយើងនិយាយយោងពីមាត្រា៣១នៃរដ្ឋធម្មនុញ ដែលនិយាយថាពលរដ្ឋមានសិទ្ធិស្មើគ្នាចំពោះមុខច្បាប់ គឺរដ្ឋធម្មនុញសរសេរអត់ន័យទេ ព្រោះអ្នកអនុវត្តច្បាប់អត់ហ៊ានអនុវត្តឲ្យស្មើភាពគ្នាចំពោះមុខច្បាប់”។ លោក សួន សេរីរដ្ឋា បន្តថាលោកនឹងប្តឹងឧទ្ធរណ៍នៅថ្ងៃទី២១ខែមីនា ឆ្នាំ២០១៦។
គួរបញ្ជាក់ថា កាលពីថ្ងៃទី២១ ខែធ្នូ ឆ្នាំ២០១៥ លោក សួន សេរីរដ្ឋា បានដាក់ពាក្យបណ្តឹងទៅតុលាការប្តឹងលោក ហោ ណាំហុង ពីបទបរិហាកេរ្តិ៍ជាសាធារណៈ និងញុះញង់ឲ្យមានការរើសអើង។ បើតាមពាក្យបណ្ដឹង លោក សួន សេរីរដ្ឋា ទាមទារជំងឺចិត្តចំនួន៥០០លានរៀល(ប្រហែល១២៥០០០ដុល្លារ) ដោយថានឹងយកថវិកាទាំងនេះជួយមន្ទីរពេទ្យគន្ធបុប្ផា។
លោក សួន សេរីរដ្ឋា បានសរសេរនៅក្នុងពាក្យបណ្តឹងនោះថាកាលពីព្រឹកថ្ងៃទី៧ ខែធ្នូ ឆ្នាំ២០១៥ នៅទីស្តីការក្រសួងការបរទេស ក្នុងពេលឆ្លងឆ្លើយជាមួយអ្នកសារព័ត៌មាន បន្ទាប់ពីជួបជាមួយឯកអគ្គរដ្ឋទូតអាមេរិកប្រចាំនៅកម្ពុជា លោក ហោ ណាំហុង បាននិយាយថា៖ “ជាពិសេសគណបក្សនៃ…សេរីរដ្ឋា នៅអាមេរិក ដែលកន្លងមកដល់មានសមាជិករបស់គេធ្វើអំពើភេរវកម្មនៅកម្ពុជាផង”។ ពាក្យបណ្តឹងបញ្ជាក់ថា៖ “ពាក្យលើកឡើងរបស់លោក ហោ ណាំហុង ធ្វើឲ្យប៉ះពាល់កិត្តិយសនិងសេចក្តីថ្លៃថ្នូរគណបក្សអំណាចខ្មែរ ជាពិសេសេការលើកឡើងថាសកម្មជនរបស់ខ្ញុំធ្វើអំពើភេរវកម្មកន្លងមក វាជាការនិយាយមិនពិត ពីព្រោះខ្ញុំនិងសមាជិករបស់ចលនាអំណាចពលរដ្ឋខ្មែរ ដែលជាចលនានយោបាយបង្កើតឡើងស្របតាមច្បាប់នៅសហរដ្អាមេរិក មិនមែនជាអង្គការភេរវកម្មនិងមិនដែលធ្វើភេរវកម្មដូចការលើកឡើងរបស់លោក ហោ ណាំហុងនោះទេ”។
យ៉ាងណាក៏ដោយ កន្លងទៅ មេធាវីការពារក្ដីឲ្យលោក ហោ ណាំហុង គឺលោក ការ សាវុត្ថ បានចេញលិខិតមួយច្បាប់ដោយលើកឡើងថាលោក ហោ ណាំហុង មិនបានបរិហាកេរ្តិ៍លោក សួន សេរីរដ្ឋា នោះទេ។ លោកបន្តថាកូនក្តីរបស់លោកគ្រាន់តែនិយាយអ្វីដែលតុលាការបានសម្រេចកាលពីកន្លងមក។ លិខិតបានរៀបរាប់ថាសាលាឧទ្ធរណ៍តម្កល់ទុកជាបានការនូវសាលក្រមព្រហ្មទណ្ឌរបស់សាលាដំបូងរាជធានីភ្នំពេញចុះថ្ងៃទី១៤ ខែមករា ឆ្នាំ២០១៥ ដែលបានផ្តន្ទាទោសលោក សួន សេរីរដ្ឋា ដាក់ពន្ធនាគារ៧ឆ្នាំនិងពិន័យជាប្រាក់២៥លានរៀលពីបទញុះញង់ប្រព្រឹត្តបទក្រិដ្ឋជាអាទិ៍ រួមគំនិតក្បត់និងអំពើរារាំងប្រជាពលរដ្ឋមានសិទ្ធិបោះឆ្នោតមិនឲ្យទៅបោះឆ្នោតនិងបង្កការរំខានមិនឲ្យដំណើរការបោះឆ្នោតបាន។ ករណីនេះ លោក សួន សេរីរដ្ឋា ត្រូវបានព្រះមហាក្សត្រលើកលែងទោស កាលពីខែកក្កដា ឆ្នាំ២០១៥៕