កម្មករ ៦នាក់ នៅរោងចក្រផលិតហាដឌីសមួយ នៅក្នុងខេត្តបន្ទាយមានជ័យ ត្រូវបានគេរាយការណ៍ថា បានរងរបួស បន្ទាប់ពីបំពង់ហ្គាសឡចំហុយអាលុយមីញ៉ូមក្នុងរោងចក្រនោះ បានផ្ទុះឆេះកាលពីយប់ថ្ងៃម្សិលមិញនេះ។ នេះដោយផ្អែកតាមសេចក្ដីរាយការណ៍នៅលើវេបសាយនគរបាលជាតិ។
វេបសាយនោះ បានឲ្យដឹងថា បំពង់ហ្គាសឡចំហុយអាលុយមីញ៉ូម នៅក្នុងរោងចក្រផលិតហាដឌីសមួយរបស់កូរ៉េខាងត្បូង ស្ថិតនៅសង្កាត់ផ្សារកណ្ដាល បានផ្ទុះឆេះ កាលពីម៉ោង ៨ និង៣០នាទីយប់ម្សិលមិញនេះ ដោយបណ្ដាលឲ្យកម្មករ ៦នាក់ រងរបួសធ្ងន់ ក្នុងនោះមានជនជាតិឥណ្ឌាម្នាក់ផងដែរ។ ជនរងគ្រោះទាំងនោះ ត្រូវបានក្រុមហ៊ុនបញ្ជូនទៅសង្គ្រោះបន្ទាន់ពីឯមន្ទីរពេទ្យ។
នៅក្នុងរយៈពេលជាង ២សប្ដាហ៍មកនេះ គ្រោះថ្នាក់ផ្ទុះក្នុងរោងចក្រ និងទីតាំងសិប្បកម្ម បានកើតឡើងជាបន្តបន្ទាប់។ កាលពីថ្ងៃទី២២ ខែមីនាកន្លងមកនេះ កម្មការិនីម្នាក់ ត្រូវបានសម្លាប់ ហើយមនុស្ស ៧នាក់ទៀតបានរងរបួស បន្ទាប់ពីឡក្នុងរោងចក្រស៊ិនតៃ នៅក្នុងខណ្ឌសែនសុខ បានផ្ទុះ។
កាលពីថ្ងៃទី០៨ ខែមេសាកន្លងមកថ្មីៗនេះ មនុស្ស ២នាក់ទៀត ត្រូវបានសម្លាប់ ហើយ ៤នាក់ទៀតបានរងរបួស បន្ទាប់ពីឡចំហុយនៃសិប្បកម្មបោះពុម្ពអាវមួយនៅក្នុងខណ្ឌមានជ័យបានផ្ទុះ៕