ខណៈបុណ្យចូលឆ្នាំកាន់តែខិតចូលមកដល់ អ្នកធ្វើដំណើរមួយចំនួនរិះគន់ថា តម្លៃឡានក្រុងនៅតែឡើងថ្លៃ ទោះបីរដ្ឋាភិបាលទទូចច្រើនដង កុំឲ្យក្រុមហ៊ុនឯកជនទាំងនោះតម្លើងថ្លៃតាមអំពើចិត្តក៏ដោយ។
ពលរដ្ឋម្នាក់គឺលោក ចាន់ ឈីវនី អាយុ៣០ឆ្នាំ ជាសិប្បករ ផ្នែកគ្រឿងសង្ហារិម នៅទីក្រុងភ្នំពេញឲ្យដឹង VOD ថា លោក និងក្រុមគ្រួសារត្រូវជិះឡានក្រុងទៅកាន់ខេត្តកំពង់សោម ដើម្បីទៅបំពេញការងារមួយចំនួន និងឆ្លៀតពេលទៅសម្រាកលំហែកាយនៅទីនោះផង។
លោកថា លោកត្រូវទិញសំបុត្រឡានចំនួន៥កៅអី សម្រាប់ប្រពន្ធ និងកូន៦នាក់ ដែលគិតជាទឹកប្រាក់ចំនួន១៧ម៉ឺន៥ពាន់រៀល។ លោកអះអាងថា សំបុត្រឡានក្រុងនៅបេនឡានសូរិយាបានតម្លើងថ្លៃពី២ម៉ឺន៤ពាន់ ទៅដល់ ៣ម៉ឺន៥ពាន់រៀល ដោយលោកថា នេះជាការតម្លើងខ្ពស់ពេកនឹកស្មានមិនដល់ទោះបីរដ្ឋាភិបាលអំពាវនាវឲ្យនៅថេរ ឬនៅដដែលក៏ដោយ។
អ្នកធ្វើដណើរម្នាក់ទៀត ដែលកំពុងរងចាំឡានក្រុងនៅបេនឡានសូរិយាដែរនោះ គឺកញ្ញា សារី ឲ្យដឹងថា កញ្ញាបានមកលេងនៅទីក្រុងភ្នំពេញនេះបួនប្រាំថ្ងៃហើយ និងថា ពេលជិះពីខេត្ដបាត់ដបងមកទីក្រុងភ្នំពេញ តម្លៃឡានក្រុងត្រឹមតែជិត២ម៉ឺនរៀលប៉ុណ្ណោះ។
កញ្ញារិះគន់ថា តម្លៃឡានក្រុង ហាក់ឡើងថ្លៃខ្ពស់ពេក គឺរហូតដល់ទៅ៣ម៉ឺន៥ពាន់រៀល ដោយថា បើទោះបីរដ្ឋាភិបាលស្នើឲ្យក្រុមហ៊ុនឯកជនទាំងនោះបន្ទាបតម្លៃ ឬរក្សាឲ្យនៅថេរក៏ដោយ។ កញ្ញាបន្ថែមថា តម្លៃឡានក្រុងគួរឡើងត្រឹមតែ២ម៉ឺន៥ពាន់រៀលទៅបានហើយ សម្រាប់ប្រជាពលរដ្ឋ ដែលចង់ធ្វើដំណើរទៅស្រុកកំណើតវិញ នៅកំឡុងពេលបុណ្យចូលឆ្នាំខ្មែរនេះ។
យុវជនម្នាក់ទៀត គឺលោក សៀង រក្សា អាយុ២២ឆ្នាំ ឲ្យដឹងថា លោកបានទិញសំបុត្រឡាននៅបេនឡានកាពីតូល រាជធានីភ្នំពេញ ដើម្បីធ្វើដំណើរទៅកាន់ខេត្តបាត់ដំបង នៅពេលចូលឆ្នាំនេះ ដោយលោកថា តម្លៃឡានមានចំនួន២ម៉ឺន៦ពាន់រៀល។ លោកថា តម្លៃនេះគឺអាចទទួលយកបាន ព្រោះឡើងតែ៣ពាន់រៀលប៉ុណ្ណោះ។
ការតម្លើងថ្លៃឈ្នួលដឹកអ្នកដំណើររបស់ក្រុមហ៊ុនឯកជនហាក់ដូចជាកំពុងផ្គើនចំណាត់ការរបស់រដ្ឋាភិបាល បន្ទាប់ពីលោកនាយករដ្ឋមន្ដ្រី ហ៊ុន សែន កាលពីថ្ងៃទី៣ ខែមេសាកន្លងទៅ បានអំពាវនាវដូចឆ្នាំមុនៗដែរ ដោយទទូចកុំឲ្យម្ចាស់រថយន្តតម្លើងថ្លៃសំបុត្រខ្ពស់ពេកក្នុងពិធីបុណ្យចូលឆ្នាំ៕
