អ្នកនាំពាក្យបក្សកាន់អំណាច បានលើកឡើងថា សំណើរបស់អ្នករាយការណ៍ពិសេសអង្កការសហប្រជាជាតិទទួលបន្ទុកសិទ្ធិមនុស្សកម្ពុជា ដែលចង់ឲ្យរដ្ឋាភិបាលកម្ពុជាវិលត្រឡប់ទៅរកផ្លូវប្រជាធិបតេយ្យសេរីពហុបក្សវិញនោះ គឺមិនឆ្លុះបញ្ចាំងពីការពិតនោះឡើយ។ ប៉ុន្ដែ អ្នកឃ្លាំមើលយល់ថា រដ្ឋាភិបាលគួរបន្ទន់ឥរិយាបថ ដើម្បីកុំឲ្យស្ថានការណ៍កាន់តែអាក្រក់ទៅ ខណៈមានទណ្ឌកម្មពីអន្ដរជាតិផងនោះ។
អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា អ្នកស្រី រ៉ូណា ស្មីត បានអំពាវនាវទៅរដ្ឋាភិបាល ឲ្យងាកទៅរកផ្លូវប្រជាធិបតេយ្យ សេរីពហុបក្ស និងធានាដល់សេរីភាពរបស់ក្រុមអង្គការសង្គមស៊ីវិល និងប្រព័ន្ធផ្សព្វផ្សាយ។
អ្នកស្រី រ៉ូណា ស្មីត បានអំពាវនាវបែបនេះ នៅក្នុងសេចក្ដីថ្លែងការណ៍មួយ ចេញនៅទីក្រុងហ្សឺណែវ នៅថ្ងៃទី១០ ខែធ្នូ ចំពេលដែលពិភពលោកកំពុងប្រារព្ធទិវាសិទ្ធិមនុស្សអន្តរជាតិ។
អ្នកស្រី រ៉ូណា ស្មីត បានថ្លែងក្នុងសេចក្ដីថ្លែងការណ៍ថា អ្នកស្រីព្រួយបារម្ភក្រៃលែងចំពោះការរំលាយគណបក្សសង្គ្រោះជាតិ ការហាមឃាត់សមាជិកគណបក្សនេះ មិនឲ្យធ្វើនយោបាយរយៈពេល ៥ឆ្នាំ និងការបែងចែកអាសនៈសភារបស់បក្សនេះ ទៅឲ្យគណបក្សផ្សេង ដែលប្រជាជនមិនបានបោះឆ្នោតឲ្យ។
អ្នកស្រី រ៉ូណា ស្មីត ចាត់ទុកវិធានការបែបនេះថា ជាការបដិសេធមិនទទួលស្គាល់សិទ្ធិរបស់ប្រជាជនមួយភាគធំ ក្នុងការចូលរួមកិច្ចការសាធារណៈ តាមរយៈតំណាងដែលពួកគេបានជ្រើសរើសដោយសេរីនាពេលកន្លងមក។
អ្នកស្រីបានអំពាវនាវទៅរដ្ឋាភិបាលកម្ពុជា ឲ្យស្ដារឡើងវិញនូវលំហសម្រាប់ប្រជាពលរដ្ឋកម្ពុជាគ្រប់រូប ដើម្បីឲ្យពួកគេអាចអនុវត្តសិទ្ធិឈរឈ្មោះបោះឆ្នោត ដោយគ្មានការភ័យខ្លាច និងការគំរាមកំហែង។
អ្នកនាំពាក្យគណបក្សប្រជាជនកម្ពុជា លោក សួស យ៉ារ៉ា មានប្រាប់វីអូឌីនៅថ្ងៃនេះថា ក្ដីបារម្ភរបស់អ្នកស្រី រ៉ូណា ស្មីត គឺមិនបានឆ្លុះបញ្ចាំងពីការពិតទាំងស្រុងនៅក្នុងសង្គមកម្ពុជាទេ និងថា ចំណាត់ការរបស់រដ្ឋាភិបាល ទៅលើក្រុមអង្គការសង្គមស៊ីវិល និងអតីតគណបក្សប្រឆាំងនោះ គឺជាការអនុវត្តច្បាប់ និងដើម្បីរក្សាសន្ដិភាពនៅកម្ពុជា។
លោកថា៖ «លោកស្រី រ៉ូណា ស្មីត គាត់លើកឡើងតាមរយៈការធ្វើទស្សនកិច្ច ម្ដងកាលៗហ្នឹង អញ្ចឹងម៉េចគាត់យល់ការងារនៅកម្ពុជា ទី២ អ្វីដែលគាត់និយាយឡើងឡើង មិនដឹងកម្ពុជាវិលត្រឡប់ទៅវិញស្អី បើកម្ពុជាអត់មានបញ្ហាស្អីផង»។
មន្ដ្រីជាន់ខ្ពស់ នៃកម្មវិធីផ្នែកអង្កេតរបស់អង្គការខុមហ្វ្រែល លោក កន សាវង្ស មានប្រសាសន៍ថា រដ្ឋាភិបាលកម្ពុជា គួរពិចារណាចំពោះក្ដីកង្វល់ទាំងឡាយរបស់អង្គការជាតិ និងអន្ដរជាតិ ដើម្បីកុំឲ្យស្ថានភាពបច្ចុប្បន្ន កាន់តែអាក្រក់ជាងនេះ។ លោកថា ប្រទេសលោកសេរីទាំងនោះ នឹងមិនទទួលស្គាល់លទ្ធបោះឆ្នោតឡើយ ប្រសិនបើស្ថានការណ៍នយោបាយ មិនថមថយកម្ដៅនោះ។
លោកថា៖ «ក្នុងកាលៈទេសៈនេះ រដ្ឋាភិបាលគួរតែពិចារណាឡើងវិញ ហើយគួរតែមើលអំពីប្រតិកម្ម ពីសហគមន៍អន្ដរជាតិ ក៏ដូចជាស្ថានភាពក្នុងស្រុកផងដែរ»។
គណបក្សសង្គ្រោះជាតិ ដែលទទួលបានសំឡេងគាំទ្រប្រហែល ៣លាននាក់នៅក្នុងការបោះឆ្នោតជាតិកាលពីឆ្នាំ២០១៣កន្លងមកនោះ ត្រូវបានតុលាការកំពូលសម្រេចរំលាយចោលកាលពីថ្ងៃទី១៦ ខែវិច្ឆិកាកន្លងមកនេះ។
ខណៈដែលមេបក្សប្រឆាំង លោក កឹម សុខា នៅតែបន្តស្ថិតនៅក្រោមការឃុំខ្លួនក្នុងពន្ធនាគារនោះ អាសនៈសភាចំនួន ៥៥របស់បក្សនេះ ក៏ត្រូវបាន គ.ជ.ប. សម្រេចបែងចែកទៅគណបក្សផ្សេងទៀត ដែលមិនត្រូវបានពលរដ្ឋបោះឆ្នោតឲ្យ។
វិធានការទាំងនេះទៅលើបក្សប្រឆាំង ត្រូវបានសហគមន៍អន្តរជាតិថ្កោលទោស ដោយចាត់ទុកថា កម្ពុជាបានដើរចាកឆ្ងាយពីគន្លងលទ្ធិប្រជាធិបតេយ្យ៕
