ជាថ្មីម្តងទៀត លោកនាយករដ្ឋមន្ត្រី ហ៊ុន សែន បានព្រមានធ្ងន់ៗថា លោកនឹងតៀមក្តារមឈូសសម្រាប់មនុស្សទាំងឡាយណាដែលថាចង់ធ្វើបដិវត្តពណ៌ ផ្តួលរំលំរដ្ឋាភិបាល។
ក្នុងពិធីសម្ពោធស្ពាននៅស្រុកកោះធំ ខេត្តកណ្តាល នាថ្ងៃទី១៣ កុម្ភៈនេះ លោក ហ៊ុន សែន បានរំឭកពលរដ្ឋដែលបានចូលរួមថា សង្គ្រាមហែកហួគ្នាកន្លងទៅ លោកថាដោយសាតែពលរដ្ឋមិនបានបែងចែងឲ្យច្បាស់ថា អ្វីជាសមិទ្ធផលពិត ដែលបានពីលោកដឹកនាំ និងអ្វីជាការសន្យាខ្យល់របស់អ្នកនយោបាយមិនកាន់អំណាច។
លោក ហ៊ុន សែន ទំនងជាចង់និយាយដល់អ្នកនយោបាយដែលមិនទាន់កាន់អំណាច ថាច្រើនតែសន្យាជួយពលរដ្ឋលើសពីបក្សកាន់អំណាច ដោយលោកប្រៀបធៀបថាស្រមោលតែងតែធំជាងរូបពិត។
លោក ហ៊ុន សែន បញ្ជាក់ថាការដែលពលរដ្ឋមិនស្គាល់ថា អ្វីជារូបពិតនិងអ្វីជាស្រមោលនោះហើយ ទើបជំរុញឲ្យប្រទេសជាតិវិលទៅរកភាពចលាចលដូចពីអតីតកាល។
លោកថា៖ «អារឿងដែលយើងក្តាប់របស់ពិតមិនជាប់ហ្នឹងហើយ ដែលវាអន្តរាយធ្វើឲ្យយើងបាត់បង់ពេលវេលា និងស្លាប់មនុស្សច្រើនណាស់ៗ។ សុខៗនាំគ្នាទៅផ្តួលរំលំសម្តេចព្រះនរោត្តម សីហនុ បង្កើតឡើងនូវសង្គ្រាមពេញប្រទេស បង្កើតរបបប្រល័យពូជសាសន៍តកូនតជំនាន់មនុស្ស ទើបដោះស្រាយមានសន្តិភាពដូចសព្វថ្ងៃក្តាប់ឲ្យជាប់រឿងសន្តិភាពនេះ»។
លោក ហ៊ុន សែន ព្រមានទាំងមិនបញ្ចេញឈ្មោះថា រដ្ឋាភិបាលនឹងចាត់វិធានការ ដោយមិនយោគយល់ទៅលើជនទាំងឡាយណា ដែលលោកថាជាអ្នកសន្យាខ្យល់ ធ្វើឲ្យមានអស្ថេរភាពនយោបាយនោះ។
លោកថា៖ «អញ្ចឹងទេ អ្នកសន្យាខ្យល់គឺអ្នកហ្នឹងឯង។ ហើយខ្ញុំសូមជំរាប កម្ពុជាក្នុងតម្លៃណាក៏ដោយ ត្រូវរក្សាសន្តិភាពឲ្យបាន។ អ្នកណាបំផ្លាញសន្តិភាពគ្មានការអត់ឱន គ្មានការលើកលែងទេ សូមបញ្ជាក់ជូនកុំប្រាថ្នាធ្វើបដិវត្តពណ៌អី អត់បានទេ អាហ្នឹងនិយាយមួយបែបទៀត ត្រៀមក្តារមឈូសឲ្យហើយទៅ អត់លេងសើចទេ»។
ក្រោយការបោះឆ្នោតឆ្នាំ២០១៣ រដ្ឋាភិបាលធ្លាប់បញ្ជាកងកម្លាំងទៅបង្ក្រាបជំរុំបាតុកម្ម ប្រឆាំងលទ្ធផលបោះឆ្នោតរបស់គណបក្សប្រឆាំងនៅទីលានប្រជាធិបតេយ្យ ក្នុងរាជធានីភ្នំពេញកាលពីថ្ងៃទី៤ ខែមករា ឆ្នាំ២០១៤ ដោយរដ្ឋាភិបាលអះអាងថា វិធានការនោះទប់ស្កាត់កុំឲ្យមានបដិវត្តពណ៌ផ្តួលរំលំរដ្ឋាភិបាល។
ក្រោយមកទៀតនៅដើមឆ្នាំ២០១៦ កម្លាំងរបស់រដ្ឋាភិបាល ក៏បានចុះបង្ក្រាបអ្នកធ្វើយុទ្ធការថ្ងៃចន្ទពណ៌ខ្មៅ ដោយអះអាងពីមូលហេតុដូចគ្នា ពីបដិវត្តពណ៌ បើទោះបីក្រុមអ្នកតវ៉ាអះអាងថា យុទ្ធនាការនោះទាមទារយុត្តិធម៌សម្រាប់អ្នកការពារសិទ្ធិមនុស្សនៅសមាគមអាដហុក ដែលកំពុងជាប់ឃុំនិងជំរុញឲ្យវែកមុខអ្នកនៅពីក្រោយការបាញ់សម្លាប់លោក កែម ឡី ក៏ដោយ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា លោកមិនឆ្លើយតបទៅនឹងការរិះគន់ថា ការសន្យាខ្យល់បែបណានោះទេ ដោយថាជាគោលនយោបាយរបស់គណបក្សផ្សេងៗគ្នា។ ប៉ុន្តែលោកថា បក្សប្រឆាំងមិនជ្រើសរើសយកការដណ្តើមអំណាចតាមរយៈបែបហិង្សានោះទេ។
លោកថា៖ «ប្រជាពលរដ្ឋខ្មែរជូរ ចត់ និងឈឺចាប់ដោយសារសង្គ្រាម ដូចនេះយើងស្អប់ខ្ពើមសង្គ្រាម យើងស្រឡាញ់សន្តិភាព ដែលមានយុត្តិធម៌ ហើយយើងចង់បានសិទ្ធិសេរីភាពក្នុងការចូលរួម ដើម្បីសម្រេចជ្រើសរើសមេដឹកនាំក្នុងពេលបោះឆ្នោតនៅពេលខាងមុខ។ យើងអត់ជ្រើសរើសមធ្យោបាយធ្វើឲ្យខ្មែរបង្ហូរឈាមគ្នាឯងនោះទេ»។
ទោះជាយ៉ាងណា សង្គមស៊ីវិលនិងអ្នកវិភាគ អះអាងថាការព្រមានរបស់រដ្ឋាភិបាលថាអាចនឹងកើតមានបដិវត្តពណ៌នេះ ពួកគេថាជាការ ខ្លាចស្រមោលខ្លួនឯង ខណៈបញ្ហាចាក់ស្រែះជាច្រើន ដូចជាការរំលោភដីធ្លី អំពើពុករលួយ បញ្ហាព្រំដែន និងអយុត្តិធម៌សង្គមជាដើម រដ្ឋាភិបាលមិនទាន់ធ្វើឲ្យពលរដ្ឋជឿបាននោះ។
មួយវិញទៀតសង្គមស៊ីវិលអះអាងថា បដិវត្តពណ៌ឬចលនាផ្តួលរំលំរដ្ឋាភិបាល នឹងមិនអាចកើតឡើងទេ នៅកម្ពុជា ដោយថាប្រទេសក្រីក្រមួយនេះផ្លាស់ប្តូរមេដឹកនាំតាមរយៈការបោះឆ្នោត៥ឆ្នាំម្តង៕
