ក្រសួងធម្មការ ឲ្យដឹងថា ខ្លួនបានចាត់បញ្ជូនក្រុមការងារខ្លួនចុះទៅត្រួតពិនិត្យ ករណីដែលចៅអធិការវត្តមួយនៅខេត្តកំពង់ស្ ពឺចេញក្បាច់គុនក្នុងវិហារ ហើយត្រូវបានគេថតវីដេអូចែកចាយពេញបណ្តាញសង្គមហ្វេសបុក។
អ្នកនាំពាក្យក្រសួងធម្មការ និងសាសនា លោក សេង សុមុន្នី បានឲ្យវីអូឌីដឹងថាកាលពីម្សិលមិញក្រសួងបានប្រជុំ និងបានសម្រេចឲ្យក្រុមការងារចុះទៅត្រួតពិនិត្យពីករណីដែលព្រះសង្ឃចេញក្បាច់គុនក្នុងពីធីបុណ្យគម្រប់២២វស្សានៃការគង់ចាំព្រះវស្សារបស់ព្រះចៅអធិការវត្តគីរីរម្យថ្មី ដែលមានព្រះនាមហៅក្រៅថា លោកតាឪ។ លោកបានឲ្យដឹងថាករណីនេះត្រូវបានក្រសួងពិនិត្យមើលថាមានពិតមែន កើតនៅវត្តគីរីរម្យថ្មី ហៅវត្តពោធិសត្វ ដែលមានទីតាំងនៅភ្នំគីរីរម្យ ស្រុកភ្នំស្រួច ក្នុងខេត្តកំពង់ស្ពឺ។
លោកថា៖ «យើងមិនទាន់ហ៊ានទេ ថាលោកខុស ឬត្រូវ ព្រោះការងារនេះ យើងសិក្សាស្រាវជ្រាវមើលឲ្យច្បាស់លាស់ព្រោះការងារនេះមាន ឯកសារអីច្បាស់លាស់ហើយយើងប្រជុំជាមួយខាងគណសង្ឃ ព្រោះលោកទទួលខុសត្រូវលើធម្មវិន័យ ខាងក្រសួងគឺជាផ្នែករដ្ឋបាល ឯខាងព្រះសង្ឃនោះមានអនុក្រឹតមួយដែលបញ្ជាក់ពីតួនាទីភារកិច្ចរបស់ព្រះសង្ឃ មានភារកិច្ចត្រូវត្រួតពិនិត្យខាងធម៌វិន័យអញ្ចឹងបើសិនជាយើងថាខុសនោះគឺយើងមិនមែនជាព្រះសង្ឃទេបងប្អូនអើយ ទុកលទ្ធភាពឲ្យលោកអញ្ចឹងនោះណា »។
សាស្ត្រាចារ្យនៃពុទ្ធិកសកលវិទ្យាល័យព្រះសីហនុរាជ្យព្រះតេជគុណ វ៉ង់ សុភ័ស មានសង្ឃដីកាថា ដោយសារកម្ពុជា កាន់និកាយសាសនាថេរវាទ ដែលត្រូវការឲ្យព្រះសង្ឃមានការសង្រួមចិត្តកាយបដិបត្តិតឹងរឹងជាងនិកាយមហាយាន។ ដូច្នេះចំពោះកាយវិការចេញក្បាច់គុនរបស់ព្រះសង្ឃដែលគង់នៅវត្តគីរីរម្យថ្មី ដែលត្រូវបានបណ្តេញសង្គមចែកចាយតគ្នានោះ ព្រះអង្គវង់ សុភ័ស យល់ថា រូបភាពនោះបានធ្វើខុសនឹងវិន័យ តែមិនទាន់ធ្ងន់ធ្ងរ ដល់ថ្នាក់ចាប់ផ្សឹកនោះទេ គឺគ្រាន់តែធ្វើការអប់រំណែនាំ និងចុះកិច្ចសន្យាតែប៉ុណ្ណោះ។
ព្រះអង្គមានសង្ឃដីការថា៖ «លោកជាភិក្ខុដែលបួសហ្នឹងត្រូវមានការសង្រួម សង្រួមកាយសង្រួមវាចាសង្រួមចិត្ត កាយហ្នឹងមិនត្រូវធ្វើអាកប្បកិរិយា ច្រង៉េងច្រង៉ាងដូចជាគ្រហស្ថទេ។ ដូចដែលវីអូឌីបានលើកឡើងមក ដូចជាបញ្ចេញកាយវិការក្បាច់គុនអីនៅនឹងមុខពុទ្ធបរិស័ទអីហ្នឹងគឺវាខុសនឹងធម៌វិន័យ តែទោសហ្នឹងចាត់ចូលក្នុងថ្នាក់លហុទោសទេ មិនទាន់ចាត់ចូលគរុទោសដែលត្រូវចាប់លោកផ្សឹកទេ »។
គួររំលឹកផងដែរថាកាលពីឆ្នាំមុន ក៏មានរឿងកើតឡើងនៅខេត្តកំពង់ស្ពឺនេះផងដែរគឺមេគណ និងជាចៅអធិការវត្តរលាំងកំពូលព្រះសង្ឃ ឌូ វណ្ណឌឿន បានឡើងច្រៀងជាច្រើនបទលើឆាកតន្ត្រី ហើយត្រូវបានគេថតបានយកមកផ្សាយតាមបណ្តាញសង្គមហ្វេសបុកនេះដូចគ្នា។ តែចំណាត់ការរបស់ក្រសួងធម្មការ និងគណៈសង្ឃនៅពេលនោះគឺគ្រាន់តែដកព្រះសង្ឃ ឌូ វណ្ឌឌឿន ចេញពីមេគណខេត្ត ដោយមិនចាប់ផ្សឹកនោះទេ ដែលចំណាត់ការនេះត្រូវបានមជ្ឈដ្ឋានមួយចំនួនយល់ថាដោយសារលោក ឌូ វណ្ឌឌឿនគឺជាអ្នកគាំទ្របក្សកាន់អំណាច៕