រដ្ឋអាជ្ញាប្រទេសកូរ៉េខាងត្បូង គ្រោងនឹងសាកសួរប្រធានាធិបតី អ្នកស្រី ផាក ហ្គឹនហេ នៅសប្ដាហ៍នេះ ជុំវិញរឿងអាស្រូវនយោបាយ ដែលកំពុងរួមរិតតំណែងរបស់គាត់នៅពេលនេះ។ នេះដោយយោងតាមការផ្សាយរបស់ទីភ្នាក់ងារព័ត៌មានកូរ៉េខាងត្បូងយ៉ុនហាប់នៅថ្ងៃនេះ។
រដ្ឋអាជ្ញាកំពុងតែស៊ើបអង្កេតថា តើអ្នកស្រី ផាក បានដាក់សម្ពាធមិនសមរម្យ ទៅលើថៅកែក្រុមហ៊ុនធំៗ ដើម្បីរៃអង្គាសថវិកាចូលក្នុងមូលនិធិ ២ ដែលពាក់ព័ន្ធនឹងមិត្តភក្តិជិតស្និទ្ធរបស់អ្នកស្រីឬយ៉ាងណា។
សេចក្ដីរាយការណ៍នានា បានផ្សាយនៅថ្ងៃនេះថា រដ្ឋអាជ្ញាបានសាកសួរប្រធានក្រុមហ៊ុន Hyundai Motor និងក្រុមហ៊ុន Korean Airlines រួចហើយ ហើយគ្រោងនឹងសាកសួរប្រធានក្រុមហ៊ុន Samsung និងថៅកែក្រុមហ៊ុនធំៗដទៃទៀត ជុំវិញរឿងអាស្រូវនយោបាយនេះ។
កាលពីល្ងាចថ្ងៃម្សិលមិញ បាតុកររាប់រយពាន់នាក់ បានដង្ហែក្បួននៅកណ្ដាលទីក្រុងសេអ៊ូល ដោយទាមទារឲ្យអ្នកស្រី ផាក ចុះចេញពីតំណែង ដោយថា អ្នកស្រី ផាក មិនសាកសមកាន់តំណែងដឹកនាំប្រទេសនោះឡើយ៕