ស្ថានទូតអាមេរិក បានប្រកាសថា ខ្លួនបានផ្ដល់មូលនិធិ ៥ម៉ឺន ៥ពាន់ដុល្លារដល់ប្រទេសកម្ពុជា ដែលជាផ្នែកមួយនៃកិច្ចខិតខំប្រឹងប្រែងថែរក្សាស្នាកស្លាមនៃអំពើប្រល័យពូជសាសន៍នៅក្នុងប្រទេសនេះ។
ស្ថានទូតអាមេរិក បានអះអាងថា ជំនួយនោះ ត្រូវបានប្រកាសផ្ដល់ដល់គម្រោងថែរក្សាសារមន្ទីរប្រល័យពូជសាសន៍ទួលស្លែង កាលពីព្រឹកថ្ងៃទី១១ ខែធ្នូកន្លងមកនេះ។
នៅលើទំព័រហ្វេសប៊ុកស្ថានទូតអាមេរិក អគ្គរដ្ឋទូតអាមេរិក លោក William Heidt បានប្រកាសដល់ជំនួយ ៥ម៉ឺន ៥ពាន់ដុល្លារ សម្រាប់ជួយថែរក្សាសម្លៀកបំពាក់ចាស់ៗរបស់ប្រជាជនកម្ពុជា ដែលត្រូវបានចាប់ខ្លួនឃុំនៅអតីតមន្ទីរសន្តិសុខ ស-២១ ដែលបច្ចុប្បន្ននេះ គឺជាសារមន្ទីរប្រល័យពូជសាសន៍ទួលស្លែង។
លោក William Heidt បានថ្លែងនៅក្នុងពិធីផ្ដល់ជំនួយនោះថា ជំនួយនោះ គឺជាផ្នែកសំខាន់មួយនៃទំនាក់ទំនងរវាងប្រជាជនអាមេរិក និងប្រជាជនកម្ពុជា។
លោកបន្ថែមថា ជំនួយនោះ បង្ហាញថា ប្រជាជនអាមេរិកនៅតែបន្តគោរពយ៉ាងជ្រាលជ្រៅចំពោះវប្បធម៌ និងប្រវត្តិសាស្ត្ររបស់កម្ពុជា។
ស្ថានទូតអាមេរិក បានអះអាងថា អាមេរិកបានផ្ដល់ជំនួយជាង ៤លានដុល្លាររួចមកហើយ សម្រាប់គម្រោងអភិរក្សាបេតិកភណ្ឌវប្បធម៌នៅទូទាំងប្រទេសកម្ពុជា ចាប់តាំងពីឆ្នាំ២០០១មក៕
