លោកនាយករដ្ឋមន្ត្រី ហ៊ុន សែន នៅល្ងាចថ្ងៃសៅរ៍នេះ បានរិះគន់ចំៗដល់ក្រសួងព័ត៌មានថា មិនបានផ្សព្វផ្សាយព័ត៌មានគ្រប់គ្រាន់ឲ្យស្ថាប័នពាក់ព័ន្ធ និងមហាជនបានដឹងពីដំណឹងសំខាន់ៗ។
នៅក្នុងវេទិកាជួបជាមួយអ្នកសារព័ត៌មាននៅថ្ងៃទី១៤ខែមករា លោក ហ៊ុន សែន បានលើកឡើងថា គេហទំព័ររបស់ក្រសួងព័ត៌មាន មិនមានព័ត៌មានឲ្យមហាជនបានមើលទេ។ លោក ហ៊ុន សែន បន្តថា ក្រសួងព័ត៌មាន កាលពីពេលកន្លងមក បានត្រឹមរិះគន់ស្ថាប័នសារព័ត៌មានដទៃ ដោយមិនបានធ្វើបច្ចុប្បន្នភាពលើការងារខ្លួន។ លោកនាយករដ្មមន្ត្រី ក៏បានបញ្ជាក់បន្ថែមថា ការផ្សព្វផ្សាយដំណឹងចុងក្រោយរបស់ក្រសួងព័ត៌មាន មានត្រឹមថ្ងៃទី១១ខែវិច្ឆិកាឆ្នាំ២០១៦ ហើយប៉ុន្មានខែចុងក្រោយនេះ គឺមិនមានព័ត៌មានថ្មីទេ។
ក្នុងពិធីនោះ លោកនាយករដ្ឋមន្ត្រី ក៏បានរិះគន់ដល់ដល់ទូរទស្សន៍ជាតិ ទទក ថាផ្សាយតែព័ត៌មានដែលផ្អូម ឬ ព័ត៌មានយឺត។ លោកក៏លើកឡើងពីគេហទំព័រស្ថាប័នមួយចំនួនដែលផ្សព្វផ្សាយរហ័ស ដូចជា ក្រសួងសេដ្ឋកិច្ច ក្រសួងកសិកម្ម និង គនរបាលជាតិជាដើម៕
