ប្រជាពលរដ្ឋប្រហែល ១០០នាក់ ដែលផ្ទះសម្បែងរបស់ពួកគេប្រឈមមុខនឹងការរុះរើនៅក្នុងតំបន់អភិរក្សអង្គរនោះ បានចេញតវ៉ានៅមុខសាលាខេត្តសៀមរាប នៅព្រឹកថ្ងៃនេះ ដោយទាមទារទៅអាជ្ញាធរខេត្តនេះ ឲ្យបញ្ឈប់ការរុះរើផ្ទះសម្បែងរបស់ពួកគេ។
អាជ្ញាធរខេត្តសៀមរាប កាលពីថ្ងៃទី០៩ ខែសីហានេះ បានជូនដំណឹងអំពីការចុះរុះរើសសំណង់នៅក្នុងតំបន់ ១ និងតំបន់ ២ ស្ថិតនៅក្នុងភូមិអញ្ច្រាញ សង្កាត់នគរធំ ក្រុងសៀមរាប ដោយថា សំណង់ទាំងនោះ ត្រូវបានសាងសង់ឡើងដោយខុសច្បាប់។
បន្ទាប់ពីការជូនដំណឹងនោះ ក្រុមអាជ្ញាធរខេត្តនេះ បានចាប់ផ្ដើមចុះរុះរើសំណង់នានា ដូចដែលអាជ្ញាធរខេត្តនេះបានប្រកាសជាមុន។
ក្នុងដៃកាន់ទៅដោយរូបថតលោកនាយករដ្ឋមន្ត្រី ហ៊ុន សែន និងភរិយាផងនោះ ក្រុមប្រជាពលរដ្ឋប្រហែល ១០០នាក់ បានប្រមូលផ្ដុំគ្នានៅមុខសាលាខេត្តសៀមរាប នៅព្រឹកនេះ ដើម្បីទាមទារឲ្យបញ្ឈប់ការចុះរើរើសំណង់របស់ពួកគេ៕
