លោក ហ៊ុន សែន បានព្រមានថា នឹងវាយខ្នោះអ្នកណា ដែលលោកថា ហ៊ាននិយាយចោទគណបក្សកាន់អំណាច ប្រើនយោបាយបណ្តេញកងទ័ពឡាវចេញពីទឹកដីខ្មែរ ដើម្បីកេងចំណេញសន្លឹកឆ្នោត។
ក្នុងពិធីចែកសញ្ញាបត្រនៅព្រឹកថ្ងៃទី១៤ ខែសីហា នេះ លោក ហ៊ុន សែន ថ្លែងថា អ្នកណាដែលអត្ថាធិប្បាយពាក់ព័ន្ធកងទ័ពឡាវចូលទឹកដីខ្មែរ ហើយបែរជាអត្ថាធិប្បាយថា ជានយោបាយរបស់គណបក្សប្រជាជនកម្ពុជា ដើម្បីចំណេញសន្លឹកឆ្នោត លោកថានឹងត្រូវតែចាប់វាយខ្នោះបុគ្គលនោះ ដូចករណីមេបក្សអំណាចខ្មែរ លោក សួន សេរីរដ្ឋា។
លោកថ្លែងថា «ខ្ញុំព្រមានសារជាថ្មីចំពោះអ្នកធ្វើអត្ថាធិប្បាយ ដើម្បីយកសំឡេងឆ្នោត បើអ្នកប្រមាថសន្តិសុខជាតិ ខ្ញុំក៏មិនអាចអត់ឱនឲ្យអ្នកឯងបានដែរ មិនមែនជាការគំរាមកំហែងទេ តែនេះជារឿងពិតដែល ត្រូវធ្វើ លើការជាក់ស្តែងបានវាយខ្នោះមួយរួចទៅហើយ»។
លោក សួន សេរីរដ្ឋា ត្រូវបានកម្លាំងសមត្ថកិច្ចចាប់ខ្លួន កាលពីថ្ងៃអាទិត្យម្សិលមិញ ក្រោយពីលោកបង្ហោះព័ត៌មាននៅលើហ្វេសប៊ុក ជេរប្រមាថមេទ័ពកម្ពុជាថា «ជាមេទ័ពចោរ»។
រីឯអ្នកនាំពាក្យក្រសួងមហាផ្ទៃ លោក ខៀវ សុភ័គ បានលើកឡើងស្រដៀងនឹងប្រសាសន៍របស់លោក ហ៊ុន សែន ដែរ ដោយលោកអំពាវនាវឲ្យសាធារណជនយល់ថា ការប្រឹងប្រែងរបស់កងព័ទ គឺដើម្បីជាតិ មិនមែនដើម្បីគណបក្សណាមួយទេ។ លោកថា ជម្លោះជាមួយឡាវនោះ ជាជម្លោះពិត មិនមែនធ្វើឡើងដើម្បីសន្លឹកឆ្នោតទេ។
អ្នកវិភាគនយោបាយ លោក ឯម សុវណ្ណារ៉ា យល់ថា ការព្រមានចាត់វិធានការច្បាប់ ឬវាយខ្នោះលើអ្នកដែលបំប៉ោងព័ត៌មានមិនពិតនោះ លោកថា រដ្ឋាភិបាលមិនគួរប្រើសារព្រមានផ្ទាល់ដល់អ្នកទំាងនោះទេ ដោយថាទុកឲ្យមន្ត្រីក្រោមឱវាទធ្វើប្រសើរជាង ដើម្បីកុំឲ្យសាធារណជនរិះគន់រដ្ឋាភិបាល។
លោកយល់ថា «មេកំពូលគេមិនដែលចេញទេ[សារព្រមាន] ករណីចុងក្រោយបានគេចេញសារហ្នឹង ដើម្បីអាកាត់មន្ទិលសង្ស័យទំាងអស់នេះ ក៏ប៉ុន្តែទិដ្ឋភាពបច្ចុប្បន្ន ដោយសារប្រឈមបញ្ហានៅស្ទាក់ស្ទើរ មន្ត្រីក្រោមឱវាទពិបាកបញ្ចេញទស្សនៈ ទើបលោកនាយករដ្ឋមន្ត្រីចេញ[សារព្រមាន]ក៏ប៉ុន្តែគ្រាន់កាលណា នាយករដ្ឋមន្ត្រីចេញ យើងមើលទៅដូចជាវិធានការក្តៅ ប៉ុន្តែជាយន្តការមួយជួយទប់ស្កាត់ព័ត៌មាន ទំាងឡាយណាដែលលើកឡើងបំភ្លៃព័ត៌មាន កន្លែងហ្នឹងខ្ញុំក៏អត់គំាទ្រឲ្យសង្គមយើងវានៅក្នុងភាពចលាចលដែរ ហើយខ្ញុំក៏អត់គំាទ្រទៅលើការគំរាមកំហែងបិទសិទ្ធិសេរីភាពបញ្ជេញមតិដែរ[មញ្ចេញមតិស្របតាមច្បាប់]»។
កាលពីយប់ថ្ងៃសុក្រ លោកនាយករដ្ឋមន្ត្រី ហ៊ុន សែន បានបញ្ជាឲ្យបញ្ជូនកម្លាំងទ័ពចេញពីក្រុងតាខ្មៅឆ្ពោះទៅកាន់ព្រំដែនជាមួយឡាវ ក្រោយពីលោកព្រមានវាយបណ្តេញទ័ពឡាវចេញពីទឹកដីនៅព្រំដែន។ សកម្មភាពបញ្ជូនទ័ពទៅព្រំដែននេះ ត្រូវបានមហាជនមួយចំនួនគាំទ្រ និងបានសរសើរថា ជាភាពក្លាហាន ការពារបូរណភាពទឹកដី ប៉ុន្តែក៏មានអ្នកខ្លះទៀតថា ជាឆាកល្ខោនរបស់រដ្ឋាភិបាល ដើម្បីយកប្រជាប្រិយភាពសម្រាប់ការបោះឆ្នោតឆ្នាំ២០១៨ខាងមុខ៕
