ស្រី្តជាជនជាតិថៃជាប់សង្ស័យថា ពាក់ព័ន្ធការបំផ្ទុះគ្រាប់បែកនៅកន្លែងស្តូបគោរពបូជា និងបន់ស្រន់មួយនៅក្នុងទីក្រុងបាងកកកាលពីឆ្នាំ២០១៥នោះ ត្រូវបានដោះលែងឲ្យស្ថិតនៅក្រៅឃុំបណ្តោះអាសន្ន ដោយមានការដាក់លុយដើម្បីធានា១លានបាត។
តាមការឲ្យដឹងរបស់មេធាវីគឺ ស្រី្តរូបនេះត្រូវដោះលែងនៅពេលដែលយកលុយទៅធានា និង គោរពតាមលក្ខខណ្ឌមួយចំនួនទៀត ដូចជាការមិនឲ្យចាកចេញពីប្រទេស ការមិនបំផ្លាញភស្តុតាង ឬមិនធ្វើឲ្យប៉ះពាល់ដល់សាក្សីផ្សេងៗទៀត។ នេះបើតាមសារព័ត៌មានបាងកកប៉ុស្តិ៍។
ស្រ្តីរូបនេះឈ្មោះ វ៉ាន់ណា ស៊ូសាន អាយុ២៩ឆ្នាំ ត្រូវសមត្ថកិច្ចចាប់ខ្លួនកាលពីថ្ងៃទី២២ខែវិច្ឆិកា នៅព្រលានយន្តហោះសុវណ្ណភូមិនៅពេលលោកស្រី ត្រលប់ចូលប្រទេសវិញជាមួយកូនប្រុសពីរនាក់។
សមត្ថកិច្ចបានខ្លួនស្រ្តីរូបនេះ តាមដីការបស់តុលាការយោធា ចេញកាលពីខែកញ្ញាឆ្នាំ២០១៥។ វ៉ាន់ណា ជាស្ត្រីជនជាតិថៃដំបូងគេដែលសង្ស័យថា ជាប់ពាក់ព័ន្ធការបំផ្ទុះគ្រាប់បែកនៅកន្លែងស្តូបបន់ស្រន់មួយនៅក្នុងទីក្រុងបាងកក ដោយសារការជួលបន្ទប់ឲ្យជនវាយប្រហារជាជនជាតិតួកគី ។
ការវាយប្រហារដោយបំផ្ទុះគ្រាប់បែកនៅស្តូបបន់ស្រន់ អ៊ីរ៉ាវ៉ាន់ កាលពីថ្ងៃទី១៧ខែសីហា ឆ្នាំ២០១៥ បានបណ្តាលឲ្យមនុស្ស២០ស្លាប់ ក្នុងនោះជនបរទេសចំនួន១២នាក់ ហើយអ្នករងរបួសមានដល់១២០នាក់។
ហេតុការណ៍នៃការវាយប្រហារពេលនោះ កើតឡើងបន្ទាប់ពីរដ្ឋអំណាចថៃបានបញ្ជូនជនជាតិអ៊ុយហ្គ័រ១០៩នាក់ ត្រឡប់ទៅប្រទេសចិនវិញ នាំឲ្យមានការរិះគន់ខ្លាំង ហើយជនជាតិអ៊ុយហ្គ័រតែងអះអាងថា ពួកគេជាជាតិតួកគី៕