អតីតអគ្គលេខាធិការអង្គការសហប្រជាជាតិ លោក បាន គីមូន បានថ្លែងនៅថ្ងៃនេះថា ការដាក់ពង្រាយខែលការពារមីសុីលរបស់អាមេរិកនៅឧបទ្វីបកូរ៉េ គឺជារឿងត្រឹមត្រូវ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
បើតាម Reuters លោក បាន គីមូន ត្រូវបានគេរំពឹងថា នឹងឈរឈ្មោះធ្វើជាប្រធានាធិបតីកូរ៉េខាងត្បូង រីឯការដាក់ពង្រាយខែលការពារមីស៊ីលរបស់អាមេរិក គ្រោងនឹងធ្វើឡើងនៅក្នុងឆ្នាំនេះ។
លោក បាន គីមូន ត្រូវបានទីភ្នាក់ងារព័ត៌មានកូរ៉េខាងត្បូងយ៉ុនហាប់ដកស្រង់សម្ដីចុះផ្សាយថា ដោយសារតែឧបទ្វីបកូរ៉េស្ថិតក្នុងស្ថានភាពមានសង្គ្រាម សកម្មភាពបែបនេះរបស់រដ្ឋាភិបាល គឺជារឿងត្រឹមត្រូវ។
ទោះជាយ៉ាងណា ប្រទេសចិនបានជំទាស់យ៉ាងខ្លាំងក្លាទៅនឹងផែនការដាក់ពង្រាយខែលការពារមីស៊ីលនេះ ដោយចិនព្រួយបារម្ភថា រ៉ាដាដ៏មានឥទ្ធិពលរបស់អាមេរិក អាចរំលោភលើដែនដីរបស់ខ្លួន។
ប៉ុន្តែ លោក បាន គីមូន ថ្លែងថា លោកយល់ថា ការដាក់ពង្រាយខែលការពារមីស៊ីលនេះ គឺជាវិធានការការពារ ខណៈដែលកូរ៉េខាងជើងកំពុងតែផលិតគ្រាប់មីស៊ីលបំពាក់ដោយក្បាលគ្រាប់នុយក្លេអ៊ែរ និងកំពុងអភិវឌ្ឍបច្ចេកវិទ្យាមីស៊ីលឆ្លងទ្វីប។
លោក បាន គីមូន បានវិលត្រឡប់ទៅប្រទេសកំណើតរបស់លោកវិញកាលពីថ្ងៃព្រហស្បតិ៍កន្លងមកនេះ បន្ទាប់ពីលោកបញ្ចប់អាណត្តិដឹកនាំអង្គការសហប្រជាជាតិអស់រយៈពេល ១០ឆ្នាំកន្លងមកនេះ៕