មន្រ្តីសាលារាជធានីភ្នំពេញឲ្យដឹងថារហូតមកដល់ថ្ងៃចន្ទនេះ មិនទាន់មានអ្នកដាក់លិខិតសុំធ្វើបាតុកម្មប្រឆាំងគណបក្សសង្រ្គោះជាតិឬមេដឹកនាំបក្សប្រឆាំងនោះទេ។
អ្នកនាំពាក្យសាលារាជធានី លោក ឡុង ឌីម៉ង់ ប្រាប់វីអូឌីថារហូតមកដល់ពេលនេះមិនទាន់ទទួលបានលិខិតសុំធ្វើបាតុកម្មពីភាគីណាមួយនៅ។ នៅពេលសួរថាតើលក្ខខណ្ឌបែបណា ទើបសាលារាជធានីអនុញ្ញាតឲ្យមានបាតុកម្ម មន្រ្តីរូបនោះបានបញ្ជាក់ថា៖ “រាល់ការដាក់ពាក្យមកគឺសាលាក្រុងធ្វើការពិនិត្យ ពិច្ច័យមើលសិន។ បាទ បានអាចឆ្លើយថាម៉េចបាន ឲ្យខ្ញុំឆ្លើយមុនសំណើម៉េច បើអញ្ចឹងគេមិនបាច់ដាក់សំណើមកខ្ញុំទេ មិនអញ្ចឹង”។
លោកនាយករដ្ឋមន្រ្តី ហ៊ុន សែន ធ្លាប់បានថ្លែងបាតុកម្មប្រឆំាងនឹងបាតុកម្មនឹងកើតមានជាថ្មីទៀត ប្រសិនបើអ្នកគំាទ្រគណបក្សប្រឆំាងនៅសហរដ្ឋអាមេរិកធ្វើបាតុកម្មប្រឆំាងរូបលោកដែលទៅចូលរួមប្រជុំអាស៊ានសហរដ្ឋអាមេរិកនៅថ្ងៃទី១៥និងថ្ងៃទី១៦ខែកុម្ភៈនេះ។
លោក ទូច វិបុល ប្រធានអង្គការសម្ព័ន្ធមិត្តខ្មែរអាមេរិកកាំងនិងជាអ្នករៀបចំបាតុកម្ម ប្រាប់វីអូឌីនៅថ្ងៃចន្ទនេះថាអ្នកចូលរួមបាតុកម្មប្រឆាំងលោក ហ៊ុន សែន នៅរដ្ឋកាលីហ្វញ៉ានៃសហរដ្ឋអាមេរិកនៅថ្ងៃទី១៥ខែកុម្ភៈ អាចមានទៅដល់ចន្លោះពី៥០០ទៅ៨០០នាក់ដែលមកពីរដ្ឋជាង១០នៅសហរដ្ឋអាមេរិកនិងប្រទេសកាណាដាផងដែរ។ លោកបន្តថាសារសំខាន់នៅក្នុងបាតុកម្មនោះគឺទាមទារឲ្យមានការគោរពសិទ្ធិមនុស្សនិងសេរីនិងគោលការណ៍លទ្ធិប្រជាធិបតេយ្យនៅកម្ពុជា។ លោកបន្តថាអ្នកចូលរួមនឹងផ្ញើសារឲ្យលោកនាយករដ្ឋមន្រ្តីចុះចេញពីតំណែងផងដែរ។ លោកបញ្ជាក់ថាបាតុកម្មនេះមិនពាក់ព័ន្ធគណបក្សសង្រ្គោះជាតិនោះទេ។
គួរបញ្ជាក់ថាកាលពីសប្តាហ៍មុន ប្រធានស្ដីទីគណកបក្សសង្គ្រោះជាតិលោក កឹម សុខា ស្នើរដ្ឋមន្ត្រីក្រសួងមហាផ្ទៃលោក ស ខេង ចាត់វិធានការការពារសន្តិសុខសុវត្ថិភាពជូនតំណាងរាស្ត្រ ថ្នាក់ដឹកនាំនិងសមាជិកគណបក្សប្រឆាំង ដោយលើកឡើងថាមានការគំរាមធ្វើបាតុកម្មនិងអាចមានការបំពានដល់រាងកាយពួកគេ។ ការស្នើនេះធ្វើឡើងបន្ទាប់ពីបុគ្គលលេចធ្លោតាមប្រព័ន្ធសង្គមហ្វេសប៊ុក និងជាអ្នកគាំទ្រគណបក្សប្រជាជនកម្ពុជានិងជាទាហានក្នុងជួរកងយោធពលខេមរភូមិន្ទ លោក ខាន់ ចាន់សុផល បានបង្ហោះសារតាមហ្វេសប៊ុកថាលោក កឹម សុខា នឹងចេញពីប្រទេសដើម្បីគេចពីអំពើហិង្សាតាមរយៈបាតុកម្មប្រឆាំងរូបលោក។ លោកបានសរសេរថា៖ “លោក កឹម សុខា ខ្លាចអ្នកគាំទ្រគណបក្សប្រជាជនកម្ពុជាធ្វើបាតុកម្ម ដុតផ្ទះរបស់គាត់ ឬទាញគាត់ចេញពីក្នុងឡាន ហើយវាយដំដូចតំណាងរាស្ត្រទាំងពីររូបនោះ”។
គួរបញ្ជាក់ថាកាលពីលោក ហ៊ុន សែន ទៅសហរដ្ឋអាមេរិកកាលពីខែកញ្ញា ឆ្នាំ២០១៥ មានបាតុកម្មអហិង្សាមួយប្រឆំាងនឹងវត្តមានរូបលោក។ មួយខែក្រោយមកខណៈពេល លោក ហ៊ុន សែន ទៅធ្វើទស្សនកិច្ចនៅប្រទេសបារំាងក៏មានបាតុកម្មដោយអហិង្សាទាមទារឲ្យលោកចុះចេញពីតំណែង។ ភ្លាមៗនោះលោក ហ៊ុន សែន បានប្រកាសពីទីក្រុងប៉ារីសមកថាលោកគំាទ្រឲ្យមានបាតុកម្មនៅកម្ពុជាតបតវិញដើម្បីទម្លាក់លោក កឹម សុខា ពីអនុប្រធានទី១នៃរដ្ឋសភា។ បាតុកម្មប្រឆាំងលោក កឹម សុខា ក៏បានកើតមាន ហើយក្នុងថ្ងៃនោះ តំណាងរាស្ត្រគណបក្សប្រឆំាងពីររូបត្រូវគេវាយឲ្យរងរបួសធ្ងន់គឺលោក គង់ សភានិងលោក ញ៉យ ចំរើន៕
