ធនាគារជាតិនៃកម្ពុជា ប្រាប់ឲ្យគ្រឹះស្ថានធនាគារនិងហិរញ្ញវត្ថុ បញ្ជាក់អត្តសញ្ញាណខ្លួនថា ជាគ្រឹះស្ថានឯកជន មិនមែនជារបស់រដ្ឋ បន្ទាប់ពីនាយករដ្ឋមន្ត្រីព្រមានបិទកាលពីសប្តាហ៍មុន។
សេចក្តីប្រកាសព័ត៌មានរបស់ធនាគារជាតិ កាលពីថ្ងៃ១៤ កុម្ភៈ ២០១៧ បានបញ្ជាក់ជាថ្មីទៀតថា គ្រឹះស្ថានធនាគារនិងហិរញ្ញវត្ថុ ជាគ្រឹះស្ថានឯកជន ហើយកាលពីថ្ងៃប្រជុំជាមួយសមាជិកក្រុមប្រឹក្សាភិបាលរបស់សមាគមធនាគារកម្ពុជា និងសមាគមមីក្រូហិរញ្ញវត្ថុកម្ពុជា នៅថ្ងៃទី៩ កុម្ភៈ ២០១៧ បានតម្រូវឲ្យអនុវត្តវិធានការជាបន្ទាន់ ចំនួន៦ចំណុច ដូចជា បន្ថែមនៅលើស្លាកយីហោរបស់ខ្លួននូវពាក្យថា «គ្រឹះស្ថានឯកជន» និងបង្ហាញស្លាកសញ្ញាពាក្យនេះ នៅទៅតាំងសមស្របក្នុងស្នាក់ការរបស់ខ្លួនដែលអតិថិជនងាយមើលឃើញជាដើម។
កាលពីសប្តាហ៍មុន លោកនាយករដ្ឋមន្រ្តី ហ៊ុន សែន ព្រមានបិទស្ថាប័នមីក្រូហិរញ្ញវត្ថុណាដែលលោកចាត់ទុកថា មិនបានអប់រំអ្នកខ្ចីប្រាក់ឲ្យយល់ច្បាស់ពីរឿងបំណុលរបស់ឯកជន ហើយអាចមានការភាន់ច្រឡំនឹងបំណុលរបស់រដ្ឋ ដោយទំនងខ្លាចប៉ះពាល់ដល់មុខមាត់គណបក្សកាន់អំណាច៕