អាមេរិកជឿជាក់ថាកូរ៉េខាងជើងជាអ្នកសម្លាប់បងប្រុសលោក គីម ជុងអ៊ុន​

ប្រភពមន្ត្រីរដ្ឋាភិបាលអាមេរិក​បានថ្លែងថា ទីភ្នាក់ងារចារម្មរបស់កូរ៉េខាងជើងជាអ្នកសម្លាប់បងប្រុសលោក គីម ជុងអ៊ុន​ នៅក្នុងប្រទេសម៉ាឡេស៊ី។​

អាជ្ញាធរអាមេរិក​ មិនទាន់បានបកស្រាយហេតុផលលម្អិតថា តើការសម្លាប់លោក គីម ជុងណាម បងលោក គីម ជុងអ៊ុន ធ្វើឡើងដោយរបៀបណានោះទេ គ្រាន់តែបញ្ជាក់ថា មានភស្តុតាងដែលបង្ហាញថា​ឃាតកម្មនោះគឺកូរ៉េខាងជើងជាអ្នកធ្វើ។​ នេះបើតាមសារព័ត៌មានChannel News Asia។​

ប្រភពរដ្ឋាភិបាលកូរ៉េខាងត្បូង ក៏បានបញ្ជាក់ដែរថា គីម ជុងណាម ត្រូវបានគេសម្លាប់នៅក្នុងប្រទេសម៉ាឡេស៊ី ប៉ុន្តែមិនផ្តល់ព័ត៌មានលម្អិតទេ។​

រដ្ឋមន្ត្រីការបរទេសកូរ៉េខាងត្បូង បានថ្លែងថា ពួកគេមិនទាន់បានទទួលរបាយការណ៍លម្អិតពីចារកម្ម ជុំវិញហេតុការណ៍នេះ នៅឡើយ។​

រដ្ឋការអាមេរិករបស់លោក ដូណល ត្រាំ មិនទាន់ផ្តល់យោបល់ជុំវិញករណីនេះទេ ខណៈអាមេរិកកំពុងប្រឈមមុខដាក់គ្នាជាមួយកូរ៉េខាងជើង ដែលកំពុងពង្រឹងអាវុធនុយក្លេអ៊ែ ហើយគំរាមកំហែងដល់អាមេរិក និង សម្ព័ន្ធមិត្តអាមេរិក រួមមានកូរ៉េខាងត្បូង និង ជប៉ុន​ជាដើម៕