គណបក្សនយោបាយមួយចំនួនបានបង្ហាញការគាំទ្រឲ្យកែច្បាប់ស្តីពីគណបក្សនយោបាយ តាមការចង់បានរបស់លោកនាយករដ្ឋមន្ត្រី ហ៊ុន សែន ប៉ុន្តែគណបក្សខ្លះទៀតបានជំទាស់។
ខ្លឹមសារសំខាន់ក្នុងសេចក្តីស្នើច្បាប់ស្តីពីគណបក្សនយោបាយនេះ គឺមិនអនុញ្ញាតិឲ្យប្រធានឬអនុប្រធានគណបក្សនយោបាយណាដែលប្រព្រឹត្តបទល្មើសព្រហ្មទណ្ឌ មានសិទ្ធិដឹកនាំបក្សបាននោះទេ។ លើសពីនេះទៀត បើប្រធាន អនុប្រធានបក្សណាមួយបានប្រព្រឹត្តបទល្មើសព្រហ្មទណ្ឌធ្ងន់ធ្ងរ ក្រសួងមហាផ្ទៃមានសិទ្ធិប្តឹងទៅតុលាការកំពូលសុំរំលាយបក្សនោះទៀតផង។
ប្រធានគណបក្សសំបុកឃ្មុំសង្គមប្រជាធិបតេយ្យ លោក ម៉ម សូណង់ដូ បានគំាទ្រឲ្យធ្វើវិសោធនកម្មច្បាប់នេះ។ លោក ម៉ម សូណង់ដូ ថែមទាំងជំរុញឲ្យប្រើច្បាប់នេះទៅរំលាយបក្សសង្គ្រោះជាតិចោលទៀតផង៖ «ខ្ញុំគំាទ្រ បើសិនធ្វើច្បាប់ហ្នឹង សម្រាប់កំទេចសង្គ្រោះជាតិ ខ្ញុំគំាទ្រមួយរយភាគរយ ព្រោះអ្នកទំាងអស់ហ្នឹង ទុកអ្នកប្រជាធិបតេយ្យ អ្នកស្នេហាជាតិ ជាសត្រូវអ្នកដឹកនាំរបស់សង្គ្រោះជាតិ មិនគួរឲ្យសង្គ្រោះជាតិ មានដំណើរការតទៅទៀតទេ គឺសង្គ្រោះជាតិជានិមិត្តរូបមួយធ្វើឲ្យស្រុកខ្មែរហោចហិន រឿងច្បាប់ល្អមិនល្អជារឿងមួយ»។
ប្រធានគណបក្សខ្មែររួបរួមជាតិ លោក ញឹក ប៊ុនឆៃ ក៏គំាទ្រ ចំពោះការធ្វើវិសោធនកម្មច្បាប់គណបក្សនយោបាយនោះដែរ ប៉ុន្តែលោកព្រួយបារម្ភថា ការអនុវត្តច្បាប់នោះជាក់ស្តែងមិនមានតម្លាភាពរវាងបក្សមានអំណាច និងបក្សនយោបាយផ្សេងៗទៀត៖ «វានៅលើការអនុវត្តជាក់ស្តែង ដែលវាជាបញ្ហាសំខាន់ដែលកន្លងមកយើងឃើញថាការអនុវត្ត ឃើញថាមិនទាន់ស្មើភាពគ្នារវាងអ្នកមានអំណាច អ្នកធំជាមួយអ្នកក្រ ធម្មតាច្បាប់គេអត់គិតអ្នកក្រ អ្នកមានទេ អ្នកធំទេ គឺទំាងអស់គ្នាស្ថិតនៅក្រោមច្បាប់ទំាងអស់គ្នាតែមួយ អត់មានស្តង់ដារពីរទេ ប៉ុន្តែកន្លងមកយើងឃើញមានបញ្ហាខ្លះៗ ការអនុវត្តច្បាប់ហាក់ដូចជាមានស្តង់ដារពីរ»។
អ្នកនាំពាក្យគណបក្សសម្ព័ន្ធ ដើម្បីប្រជាធិបតេយ្យ លោក ពូវ គា គាំទ្រផងនិងមិនគាំទ្រផង៖ «ខ្ញុំនិយាយលក្ខខណ្ឌពីរ ទីមួយប្រសិនជាប្រទេសមួយមានច្បាប់ត្រឹមត្រូវ ច្បាប់មួយមានប្រសិទ្ធិភាព អាចអនុវត្តលើមនុស្សទូទៅ ខ្ញុំគំាទ្រ ប៉ុន្តែស្ថានភាពស្រុកខ្មែរគឺច្បាប់វាមិនមានតម្លៃជាសកល វាមិនអាចអនុវត្តទៅលើមនុស្សទូទៅ យើងខុសឬក៏ត្រូវគឺវាអាស្រ័យទៅលើគេ ព្រោះអីខុសឬមិនខុសរបស់យើង វាមិននៅលើយើង គឺនៅលើមាត់គេថា»។
ចំណែកអ្នកនាំពាក្យគណបក្សប្រជាធិបតេយ្យមូលដ្ឋានលោក សាម អ៊ីន ឯណោះវិញ មានប្រសាសន៍ថាច្បាប់នេះអាចធ្វើឲ្យប៉ះពាល់ដល់បក្សដែលទើបបង្កើតថ្មីនាពេលខាងមុខ និងក៏ប៉ះពាល់ដល់បក្សសង្គ្រោះជាតិមុនគេ ដោយលោកថា បក្សកាន់អំណាចកំពុងតែមានចេតនាមិនល្អ ដើម្បីរាំងខ្ទប់ដៃគូ ប្រគូតរបស់ខ្លួន ផ្ទុយពីរដ្ឋធម្មនុញ្ញ៖ «សេចក្តីព្រាងច្បាប់នេះគឺមានចេតនាមិនល្អទេ គឺព្យាយាមបន្ទុចបង្អាក់ ខាឃំាងឬមួយក៏ទាត់ចោលមិនឲ្យដៃគូអាចចូលរួមប្រកួតប្រជែងដោយស្មើភាព ហើយទីពីរទៀត វាប៉ះពាល់ទៅដល់ស្មារតីនៃរដ្ឋធម្មនុញ្ញដែលបានចែងក្នុងប្រទេសកម្ពុជា ដែលប្រកាន់គោលការណ៍ប្រជាធិបតេយ្យសេរីពហុបក្ស កាលណាយើងបង្កើតច្បាប់មួយដែលតឹងតែង ដែលកំហិត ដែលមានទម្រង់បែបគំរាមកំហែងមកធ្វើទុកបុកម្នេញបែបនេះគឺជាការមិនល្អទេ សម្រាប់វាសនាអនាគតប្រជាធិបតេយ្យនៅក្នុងប្រទេសកម្ពុជា»។
ប្រធានគណៈកម្មការជំនាញនៅរដ្ឋសភា មកពីគណបក្សសង្រ្គោះជាតិ ក៏បានទាមទារឲ្យពន្យាពេលការកែច្បាប់ដ៍ចម្រោងចម្រាស់មួយនេះដោយដឹងថាច្បាប់នេះជាគោលដៅចង់រំលាយគណបក្សប្រឆាំងធំជាងគេនេះ។ប៉ុន្តែអ្នកនាំពាក្យគណបក្សប្រជាជនកម្ពុជា លោក សុខ ឥសាន បានប្រាប់VODថា សេចក្តីស្នើវិសោធនកម្មច្បាប់នេះ គឺបក្សប្រជាជនកម្ពុជានឹងដាក់ទៅរដ្ឋសភាអនុម័តយ៉ាងយូរនៅចុងខែកុម្ភៈនេះ។
កាលពីពេលថ្មីៗនេះ លោក ហ៊ុន សែន បានមានប្រសាសន៍ដដែលថា ហាមមិនឲ្យអ្នកមានទោសធ្វើជាប្រធាន និងអនុប្រធានគណបក្សនយោបាយនោះទេ ដែលទំនងសំដៅដល់ លោក សម រង្ស៊ី។ ប៉ុន្តែ លោក សម រង្ស៊ី បានប្រកាសលាលែងពីប្រធានគណបក្សសង្រ្គោះជាតិ បានមុនច្បាប់នេះចេញទៅទៀត ដែលអ្នកវិភាគយល់ថា ធ្វើឲ្យបក្សកាន់អំណាចដាច់ផ្ងា៕
