យ៉ាងហោចណាស់មនុស្សចំនួន១៧នាក់បានស្លាប់នៅក្នុងហេតុការណ៍បាញ់ប្រហារមួយនៅក្នុងសាលាវិទ្យាល័យក្នុងរដ្ឋហ្វ័ររីដា សហរដ្ឋអាមេរិក។
ហេតុការណ៍នេះ កើតឡើងនៅក្នុងវិទ្យាល័យ Marjory Stoneman Douglas នៅថ្ងៃពុធម្សិលមិញ។
តាមការចុះផ្សាយរបស់ AFP បានឲ្យដឹងថា ដំបូងឡើយសិស្សនៅក្នុងសាលាបានឮសំឡេងកាំភ្លើងប៉ុន្តែពួកគេគិតថា នោះជាសកម្មភាពយោធាហាត់សម ឬ ជាការដុតកាំជ្រួចអបអរអ្វីមួយ។ បន្ទាប់មកឃើញមិត្តរួមសាលារបស់ពួកគេស្លាប់ទើបនាំរត់រកកន្លែងសុវត្ថិភាពដើម្បីលាក់ខ្លួន។
ជនសង្ស័យម្នាក់ដែលសមត្ថកិច្ចចាប់ខ្លួននោះឈ្មោះ Nikolas Cruz អាយុ១៩ឆ្នាំ ជាអតីតសិស្សនៅក្នុងសាលានេះ ដែលត្រូវបានបណ្តេញចេញឈប់ឲ្យរៀន ដោយសារមិនគោរពវិន័យ។
របាយការណ៍សមត្ថកិច្ចបង្ហាញថា ដំបូងឡើយយុវជនរូបនេះ បាញ់សម្លាប់មនុស្សពីរនាក់នៅខាងមុខសាលា ហើយចូលក្នុងបរិវេណសាលាបាញ់សម្លាប់មនុស្ស១៥នាក់ទៀត។ ក្នុងចំណោមអ្នកស្លាប់នោះក៏មាន គ្រូបង្រៀនផ្នែកកីឡាដែរ។
ក្រៅពីអ្នកស្លាប់១៧នាក់នេះ ក៏មានអ្នករងរបួសមួយចំនួនដែលកំពុងនាំយកទៅសង្គ្រោះក្នុងមន្ទីរពេទ្យស្ថិតនៅក្នុងស្ថានភាពធ្ងន់ធ្ងរ។
ហេតុការណ៍បាញ់ប្រហារនៅពេលនេះ គេចាត់ទុកជាហេតុការណ៍បាញ់ប្រហារធំបំផុត បន្ទាប់ពីការបាញ់ប្រហារនៅក្នុងសាលាកាលពីឆ្នាំ២០១២ ដែលកាលណោះសម្លាប់មនុស្សអស់២៦នាក់។
ក្រោយហេតុការណ៍នេះ ភ្លាម លោក ដូណល ត្រាំ ថ្លែងចូលរួមមរណទុក្ខជាមួយក្រុមគ្រួសារ ហើយប្តេជ្ញាពង្រឹងមិនឲ្យសាលារៀនក្លាយជាកន្លែងភ័យខ្លាចរបស់កុមារ និង ឪពុកម្តាយពួកគេបន្តទៀតនោះទេ។
ទោះយ៉ាងណានៅអាមេរិកក្នុងដើមឆ្នាំ២០១៨នេះ មានករណីបាញ់ប្រហារនៅតាមសាលារៀនចំនួន៦លើករួចមកហើយ ដែលករណីខ្លះមានអ្នកស្លាប់ និងខ្លះទៀតរងរបួស។
បើគិតចាប់ពីឆ្នាំ២០១៣មក មានករណីបាញ់ប្រហារនៅតាមសាលារៀនចំនួន២៩១ករណី ហើយបើគិតជាមធ្យមក្នុង១សប្តាហ៍មានករណីបាញ់ប្រហារមួយកើតឡើង៕