ស្រ្តីជនជាតិឥណ្ឌូនេស៊ីម្នាក់ដែលធ្វើការតាមផ្ទះនៅម៉ាឡេស៊ី ត្រូវម្ចាស់ផ្ទះ ឲ្យដេកខាងក្រៅជាមួយឆ្កែ និង ធ្វើទារុណកម្មរបួសស្ទើរពេញខ្លួន ហើយបានស្លាប់ក្រោយពេលដែលបញ្ជូនទៅព្យាបាលនៅមន្ទីរពេទ្យ។
ស្ត្រីដែលស្លាប់នោះគេស្គាល់ឈ្មោះថា Adelina ធ្វើការជាអ្នកបម្រើតាមផ្ទះនៅក្នុងរដ្ឋ Penang នៃប្រទេសម៉ាឡេស៊ី។ នេះបើតាមសារព័ត៌មាន BBC។
Adelina ត្រូវបានជួយសង្គ្រោះកាលពីថ្ងៃសៅរ៍ទី១០ខែកុម្ភៈ បន្ទាប់ពីអ្នកជិតខាងរាយការណ៍ទៅកាន់អ្នកនយោបាយម្នាក់ឈ្មោះ Steven Sim។ ពេលនោះគេសង្គ្រោះហើយនាំនាងទៅព្យាបាលនៅមន្ទីរពេទ្យ បន្ទាប់មកមួយថ្ងៃគឺនៅថ្ងៃអាទិត្យនាងបានស្លាប់។
ស្ត្រីធ្វើការតាមផ្ទះរូបនេះ គេរកឃើញថា មានដំបៅស្ទើរពេញខ្លួន ដោយសារសត្វខាំ ការធ្វើទារុណកម្ម និង សុខភាពខ្សោយខ្លាំងដោយសារបង្អត់អាហារ។
ទីភ្នាក់ងារព័ត៌មានម៉ាឡេស៊ី Bernama ចុះផ្សាយថា ពេលនេះ ស្ត្រីម្នាក់អាយុ៣៦ឆ្នាំ និង បងប្រុសរបស់នាង កំពុងស្ថិតនៅក្នុងការស៊ើបអង្កេតពីបទមនុស្សឃាតក្នុងករណីនេះ។ ចំណែកស្ត្រីម្នាក់ជាម្តាយនៅក្នុងគ្រួសារនេះអាយុ៦០ឆ្នាំ ក៏ត្រូវបានឃុំខ្លួន ដើម្បីសាកសួរចម្លើយដែរ។
អ្នកនយោបាយលោក Steven Sim ថ្លែងថា ការស្លាប់ស្ត្រីធ្វើបម្រើការតាមផ្ទះនេះ ធ្វើឲ្យពលរដ្ឋម៉ាឡេស៊ីមានការខឹងសម្បារម្ចាស់ផ្ទះនោះយ៉ាងខ្លាំង។
រដ្ឋមន្ត្រីក្រសួងការបរទេសរបស់ឥណ្ឌូនេស៊ីលោកស្រី Retno Marsudi ថ្លែងថា លោកស្រីត្រូវការយុត្តិធម៌ចំពោះករណីស្លាប់នេះ។ លោកស្រីបានបញ្ជាទៅកុងស៊ុលប្រចាំនៅម៉ាឡេស៊ីឲ្យធ្វើការទាមទារ ការខូចខាតឲ្យពលករឥណ្ឌូនេស៊ី។
ម៉ាឡេស៊ីគឺជាប្រទេសដែលនាំចូលពលករច្រើនជាងគេបំផុតនៅក្នុងតំបន់អាស៊ី ហើយការនាំចូលនេះផ្តល់ប្រាក់ខែក្នុងកម្រិតទាប។
បច្ចុប្បន្នពលរដ្ឋឥណ្ឌូនេស៊ីប្រមាណ២លាន៥សែននាក់ កំពុងធ្វើការនៅក្នុងប្រទេសម៉ាឡេស៊ី ហើយក្នុងនោះពាក់កណ្តាលគឺធ្វើការនៅតាមផ្ទះ។
អ្នកធ្វើការនៅក្នុងប្រទេសម៉ាឡេស៊ីក្រៅពីឥណ្ឌូនេស៊ី ក៏មានមកពីប្រទេសហ្វីលីពីន មីយ៉ាន់ម៉ា វៀតណាម បង់ក្លាដេស ឡាវ កម្ពុជា ស្រីលង្កា និង ថៃ៕