មន្ត្រីសាលាដំបូងរាជធានីភ្នំពេញ បានឲ្យដឹងថា តុលាការកំពុងពិនិត្យ និងចាត់ការតាមនីតិវិធីច្បាប់ទៅលើក្រុមមន្ត្រីជាន់ខ្ពស់អតីតបក្សប្រឆាំង ៥រូប ទៅតាមបណ្ដឹងរបស់ក្រសួងមហាផ្ទៃ ជុំវិញការបង្កើតចលនាសង្គ្រោះជាតិ។
កាលពីសប្ដាហ៍មុន ក្រសួងមហាផ្ទៃបានដាក់ពាក្យបណ្ដឹងទៅសាលាដំបូងរាជធានីភ្នំពេញប្ដឹងអតីតមន្ត្រីជាន់ខ្ពស់នៃចលនាសង្គ្រោះជាតិចំនួន ៥ រូប ដែលក្រសួងចោទថា ធ្វើសកម្មភាពនយោបាយខុសច្បាប់។
ការដាក់ពាក្យបណ្ដឹងរបស់ក្រសួងនេះ ធ្វើឡើងបន្ទាប់ពីលោក សម រង្ស៊ី ដែលកំពុងរស់នៅនិរទេសខ្លួននៅឯបរទេសដើម្បីគេចចេញពីបណ្ដឹងតាមផ្លូវតុលាការនៅកម្ពុជានោះ បានសម្រេចបង្កើត «ចលនាសង្គ្រោះជាតិ» នៅឯសហរដ្ឋអាមេរិកកាលពីចុងខែមករាកន្លងមកនេះ។
អ្នកនាំពាក្យអយ្យការអមសាលាដំបូងភ្នំពេញ លោក លី សុផាណា ប្រាប់វីអីឌីតាមរយៈសារអេឡិចត្រូនិកនៅថ្ងៃនេះថា តុលាការបានទទួលពាក្យបណ្តឹងរបស់ក្រសួងមហាផ្ទៃរួចហើយ និងកំពុងពិនិត្យបណ្ដឹងនោះ និងចាត់ការតាមនីតិវិធី។
លោក លី សុផាណាថា៖ «អយ្យការអមសាលាដំបូងបានទទួលបណ្តឹងនេះ ហើយកំពុងពិនិត្យនិងចាត់ការតាមនីតិវិធី»។
អ្នកនាំពាក្យក្រសួងមហាផ្ទៃ លោក ខៀវ សុភ័គ មិនបានបង្ហាញឈ្មោះមន្ត្រីអតីតបក្សប្រឆាំងទាំង ៥រូបនោះ ដែលត្រូវបានក្រសួងមហាផ្ទៃប្ដឹងទៅតុលាការនោះឡើយ។
ប៉ុន្តែ លោកបានឲ្យដឹងថា ក្រសួងបានសម្រេចប្ដឹងមន្ត្រីជាន់ខ្ពស់ ៥រូប នៃចលនាសង្គ្រោះជាតិដែលផ្ដួចផ្ដើមដោយលោក សម រង្ស៊ី ទៅតុលាការ បន្ទាប់ពីក្រសួងប្រមូលបានភស្តុតាងជាច្រើនតាមប្រព័ន្ធផ្សព្វផ្សាយ និងបណ្ដាញសង្គមហ្វេសប៊ុកនាពេលកន្លងមក ពាក់ព័ន្ធនឹងសកម្មភាពរបស់ក្រុមមន្ត្រីទាំងនោះនៅឯក្រៅប្រទេស។
លោកថា៖ «គង់នឹងតុលាការគេហៅ គង់នឹងដឹងអ្នកណាខ្លះ ហើយអ្នកដែលយើងមិនប្រាប់ ក៏ក្មួយអាចដឹងដែរ។ និយាយរួមមន្ត្រីទាំងនោះសុទ្ធតែមានឈ្មោះនៅក្នុងសាលដីកាតុលាការកំពូល ដែលបានហាមឃាត់មិនឲ្យធ្វើសកម្មភាពនយោបាយ ដែលគាត់នៅតែគឃ្លើនធ្វើ ដោយមិនអនុវត្តទៅតាមសាលដីកាហ្នឹង ហើយការធ្វើហ្នឹង ធ្វើឲ្យប៉ះពាល់ដល់ផលប្រយោជន៍ជាតិធំសម្បើមណាស់។ អញ្ចឹងបានយើងប្ដឹងទៅតុលាការសុំឲ្យតុលាការរកវិនិច្ឆ័យពីសកម្មភាពហ្នឹង»។
អ្នកស្រាវជ្រាវពីការអភិវឌ្ឍន៍សង្គម លោក មាស នី មើលឃើញថា ការប្ដឹងមន្ត្រីជាន់ខ្ពស់នៃចលនាសង្គ្រោះជាតិនៅក្រៅប្រទេស វាមិនបានចំណេញអ្វីទៅរដ្ឋាភិបាលនោះទេ ផ្ទុយទៅវិញ វានឹងធ្វើឲ្យប៉ះពាល់មុខមាត់រដ្ឋាភិបាលនៅលើឆាកអន្តរជាតិទៅវិញ។ លោកចាត់ទុកការប្ដឹងនេះថា វាជារូបភាពគំរាមកំហែមមន្ត្រីរបស់គណបក្សប្រឆាំងនៅក្នុងប្រទេសផងដែរ។
លោកថា៖ «កាលណាមានពាក្យបណ្ដឹងដល់អ្នកក្រៅប្រទេស អ្នកនៅក្នុងប្រទេសក៏ត្រូវប្រុងប្រយ័ត្នដែរ រឿងហ្នឹង វាត្រូវតែអញ្ចឹង យើងមកដល់សព្វថ្ងៃនេះ វាការអនុវត្តច្បាប់វាហាក់មិនមានតម្លាភាពគ្រប់គ្រាន់ មិនមានយុត្តិធម៌គ្រប់គ្រាន់ទេ ហើយយើងក៏នៅតែ មើលឃើញស្តង់ដារដែរ នៅក្នុងការអនុវត្តច្បាប់ហ្នឹង»។
«ចលនាសង្គ្រោះជាតិ» ត្រូវបានផ្ដួចផ្ដើមបង្កើតឡើងដោយអតីតមេដឹកនាំបក្សប្រឆាំងលោក សម រង្ស៊ី កាលពីចុងខែមករាកន្លងមកនេះ បន្ទាប់ពីគណបក្សសង្គ្រោះជាតិ ត្រូវបានតុលាការកំពូលសម្រេចរំលាយចោលកាលពីពាក់កណ្ដាលខែវិច្ឆិកាឆ្នាំមុន ខណៈដែលលោក កឹម សុខា នៅតែបន្តស្ថិតនៅក្រោមការឃុំខ្លួនចាប់តាំងពីត្រូវបានចាប់ខ្លួនកាលពីដើមខែកញ្ញាឆ្នាំមុនមក៕