ប្រទេសចិនបានចាប់ផ្ដើមការងារសំណង់ថ្មីនៅដែនទឹកមានជម្លោះ នៅសមុទ្រចិនខាងត្បូង ដែលជាសញ្ញាបង្ហាញថា ក្រុងប៉េកាំងកំពុងតែបន្តពង្រឹងអំណាចយោធារបស់ខ្លួន នៅលើតំបន់នោះ ដែលជាច្រកពាណិជ្ជកម្មដ៏សំខាន់។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters ដែលផ្អែកលើរូបភាពចាប់បានពីផ្កាយរណប។
ក្រុមមន្ត្រីយោធាប្រចាំតំបន់ និងអ្នកជំនាញជឿថា កិច្ចការសំណង់ថ្មីនោះ បង្ហាញពីការសម្រេចចិត្តរបស់ចិន ក្នុងការកសាងបណ្ដាញនៅលើបណ្ដាកោះប៉ប្រះទឹកនៅសមុទ្រចិនខាងត្បូង បើទោះបីជាក្រុងប៉េកាំងកំពុងព្យាយាមបញ្ចៀសការប្រឈមមុខបន្ថែមទៀតនឹងរដ្ឋបាលប្រធានាធិបតី លោក ដូណាល់ ត្រាំ ក៏ដោយ។
រូបភាពនៃកោះខាងជើងនៅប្រជុំកោះប៉ារ៉ាសែល ដែលគេថតបាននៅថ្ងៃទី០៦ ខែមីនា បង្ហាញនូវការសាងសង់ថ្មីៗ ក្នុងនោះមានការចាត់ចែងដី និងការរៀបចំកំពង់ផែ ដែលអាចជួយដល់កិច្ចការនានា ដែលអ្នកជំនាញជឿថា អាចជាមូលដ្ឋានយោធា។ ការងារសាងសង់ដំបូង ត្រូវបានព្យុះទីហ្វុងបោកបក់បំផ្លាញកាលពីឆ្នាំមុន។
រូបភាពដែលផ្ដល់ដោយក្រុមហ៊ុនផ្កាយរណបឯកជននោះ បានកើតឡើងក្រោយពីមានសេចក្ដីរាយការណ៍កាលពីខែមករា ដែលបង្ហាញពីការងារសាងសង់កំពុងដំណើរការនៅលើកោះបីនៅក្បែរនោះ និងនៅប្រជុំកោះប៉ារ៉ាសែល ដែលវៀតណាម និងកោះតៃវ៉ាន់ ក៏បានអះអាងជាម្ចាស់ផងដែរ
ក្រុមអ្នកកាទូតលោកខាងលិចនិយាយថា ក្រុងប៉េកាំងកំពុងតែប្រឹងប្រែងដើម្បីគ្រប់គ្រងលើដែនទឹករបស់ខ្លួន បើទោះបីជាចិនព្យាយាមគេចចេញពីសកម្មភាពដែលគេចោទថាបង្កហេតុក៏ដោយ៕
