មេបញ្ជាការព្រំដែនគោក នៅស្រុកសៀមប៉ាង ខេត្តស្ទឹងត្រែង បានឲ្យដឹងថា មន្រ្តីការពារព្រំដែនម្នាក់បានស្លាប់ ខណៈចុះបំពេញបេសកកម្មការពារបូរណភាពទឹកដី។
មេបញ្ជាការវរៈសេនាតូច ការពារព្រំដែនគោកលេខ៧០១ លោក ស៊ុន បាន មានប្រសាសន៍ប្រាប់VODនៅថ្ងៃទី១៥ ខែសីហា នេះថា អនុសេនីយ៍ត្រី ប៊ុន នឿង បានស្លាប់ ខណៈជិះទូកម្នាក់ឯង ទំនងបុកថ្មបណ្តាលឲ្យលិច ស្ថិតនៅចំណុចអូអាឡៃ កោះឫស្សី ឃុំសន្តិភាព ស្រុកសៀមប៉ាង ខេត្តស្ទឹងត្រែង នៅថ្ងៃទី១២ ខែសីហា ឆ្នាំ២០១៧ ខណៈដែលគាត់ចុះបំពេញបេសកកម្មការងារ ត្រៀមបណ្តេញកងទ័ពឡាវចេញពីទឹកដីកម្ពុជា។
លោកនិយាយថា «គាត់ចុះអញ្ចឹង គាត់មិនបញ្ឆេះម៉ាស៊ីនទេ ទូកគាត់ចែវមក មិនដឹងថាគាត់ផំាង ឬយ៉ាងម៉េចទេ វាអាចថា ងងឹតមុខ ឬខ្យល់គរ បើតាមការពិនិត្យសាកសពអត់មានប៉ះអ្វីនោះទេ»។
គួររំឮកថា កាលពីយប់ថ្ងៃទី១១ ខែសីហា លោកនាយករដ្ឋមន្ត្រី ហ៊ុន សែន បានបញ្ជាឲ្យបញ្ជូនកម្លាំងទ័ពចេញពីក្រុងតាខ្មៅឆ្ពោះទៅកាន់ព្រំដែនជាមួយឡាវ ក្រោយពីលោកព្រមានវាយបណ្តេញទ័ពឡាវចេញពីទឹកដីនៅព្រំដែន។ សកម្មភាពបញ្ជូនទ័ពទៅព្រំដែននេះ ត្រូវបានមហាជនមួយចំនួនគាំទ្រ និងបានសរសើរថា ជាភាពក្លាហាន ការពារបូរណភាពទឹកដី ប៉ុន្តែក៏មានអ្នកខ្លះទៀតថា ជាឆាកល្ខោនរបស់រដ្ឋាភិបាល ដើម្បីយកប្រជាប្រិយភាពសម្រាប់ការបោះឆ្នោតឆ្នាំ២០១៨ខាងមុខ។
ទោះជាយ៉ាងណាក្រោយពីបញ្ជូនទ័ពទៅដល់គោលដៅ ឡាវបានដកទ័ពត្រឡប់ទៅស្រុកកំណើតវិញ ប៉ុន្តែកងទ័ពរបស់កម្ពុជាម្នាក់បានស្លាប់ ដោយសារជិះទូកចុះការពារទឹកដី៕