ក្រុមសិទ្ធិមនុស្សបានបង្ហាញភស្តុតាងបន្ថែមទៀត ជុំវិញការចោទថា ក្រុមយោធាមីយ៉ាន់ម៉ា រៀបចំជាយុទ្ធនាការក្នុងការ ដុតភូមិរបស់ក្រុមជនជាតិភាគតិចរ៉ូហ៊ីងយ៉ាងនៅក្នុងរដ្ឋរ៉ាកឃីត ក្នុងគោលបំណងបំបាត់ពូជសាសន៍របស់ក្រុមជនជាតិភាគតិចនេះ។
អង្គការលើកលែងទោសអន្តរជាតិ បានបង្ហាញភស្តុតាងជារូបភាពថតពីអាកាស ដែលបង្ហាញក្រុមយោធាបានដុតផ្ទះក្នុងភូមិដែលជនជាតិភាគតិចរ៉ូហ៊ីងយ៉ារស់នៅក្នុងបំណងបណ្តេញជនជាតិភាគតិចទាំងនេះ ចេញពីប្រទេសរបស់ពួកគេ។ នេះបើតាមសារព័ត៌មាន BBC។
ទោះយ៉ាងណាក្រុមយោធា បញ្ជាក់ម្តងហើយម្តងទៀតថា ពួកគេបើកការវាយប្រហារតែលើក្រុមប្រដាប់អាវុធបះបោរផ្តាច់ខ្លួនតែប៉ុណ្ណោះ មិនបានវាយប្រហារលើជនស៊ីវិលនោះទេ។
របាយការណ៍របស់អង្គការសហប្រជាជាតិបានបង្ហាញថាចំនួនជនជាតិភាគតិចរ៉ូហ៊ីងយ៉ា រត់ចេញពីមីយ៉ាន់ម៉ា ទៅក្នុងប្រទេសបង់ក្លាដេសបានកើតឡើងដល់ប្រមាណ ៣៨៩ ០០០នាក់ ដោយសារតែការរងទុកបុកម្នេញពីក្រុមយោធាមីយ៉ាន់ម៉ា៕
