ប្រទេសកម្ពុជា នៅថ្ងៃនេះ បានរៀបចំរំលឹកខួប ៥ឆ្នាំនៃការសោយទិវង្គតរបស់អតីតព្រះមហាក្សត្រសម្ដេចព្រះ នរោត្ដម សីហនុ។
អតីតព្រះមហាក្សត្រ នរោត្ដម សីហនុ ដែលជាព្រះបិតាព្រះមហាក្សត្រ នរោត្ដម សីហមុនី ត្រូវបានរដ្ឋាភិបាលកម្ពុជាប្រកាសថា បានយាងសោយទិវង្គតកាលពីថ្ងៃទី១៥ ខែតុលា ឆ្នាំ២០១២ ក្នុងជន្មាយុ ៩០ឆ្នាំ នៅឯទីក្រុងប៉េកាំង ប្រទេសចិន។
ដោយភ្ជាប់មកជាមួយនូវរូបថតរបស់ព្រះបរមរតនកោដ្ឋ លោកនាយករដ្ឋមន្ត្រី ហ៊ុន សែន បានបង្ហោះសារនៅលើទំព័រហ្វេសប៊ុករបស់លោកនៅព្រឹកថ្ងៃនេះថា ប្រជាជនកម្ពុជា ដែលលោកថា ជាកូន ចៅ ចៅទួត ចៅលួត នោះ ពិតជាចងចាំមិនអាចបំភ្លេចបាននូវព្រះរាជសកម្មភាពរបស់អតីតព្រះមហាក្សត្រអង្គនេះ។
លោក ហ៊ុន សែន បានរៀបរាប់បន្តថា អតីតព្រះមហាក្សត្រ នរោត្ដម សីហនុ បានលះបង់ព្រះកាយពល និងព្រះបញ្ញាពាណ ដើម្បីបុព្វហេតុជាតិមាតុភូមិ និងនាំមកនូវឧត្តមប្រយោជន៍សម្រាប់ប្រជាជនកម្ពុជា។
នៅឯសួនច្បារវិមានឯករាជ្យ ក្រុមមន្ត្រីជាន់ខ្ពស់ក្នុងជួររដ្ឋាភិបាល បានប្រមូលផ្ដុំគ្នាដាក់កម្រងផ្កា និងគោរពដល់រូបសំណាក់អតីតព្រះមហាក្សត្រអង្គនេះ ដែលត្រូវបានដាក់តម្កល់នៅមិនឆ្ងាយពីវិមានឯករាជ្យ។
អតីតព្រះមហាក្សត្រ នរោត្ដម សីហនុ ប្រសូតនៅក្នុងឆ្នាំ១៩២២ និងបានឡើងសោយរាជ្យសម្បត្តិនៅក្នុងឆ្នាំ១៩៤១ អំឡុងពេលដែលប្រទេសកម្ពុជាស្ថិតនៅក្រោមរបបអាណាព្យាបាលបារាំង។
អតីតក្សត្រអង្គនេះ បានទាមទារឯករាជ្យសម្រាប់កម្ពុជាពីប្រទេសបារាំងនៅឆ្នាំ១៩៥៣ ព្រមទាំងបានដឹកនាំប្រទេសកម្ពុជារហូតដល់ឆ្នាំ១៩៧០ នៅពេលព្រះអង្គត្រូវបានទម្លាក់ចេញពីអំណាចដោយរដ្ឋប្រហារ។
ក្រោយពីកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ អតីតព្រះមហាក្សត្រ នរោត្ដម សីហនុ ត្រូវបានយាងឲ្យឡើងសោយរាជ្យជាថ្មីនៅឆ្នាំ១៩៩៣ រហូតដល់ទ្រង់ដាក់រាជសម្បត្តិនៅខែតុលាឆ្នាំ២០០៤៕
