មន្រី្តក្រសួងមហាផ្ទៃរបស់បារាំងបានថ្លែងថា រថភ្លើង១គ្រឿង និងរថយន្តក្រុងដឹកសិស្សមួយគ្រឿង បានបុកគ្នា នៅជិតទីក្រុងភឺភីណាន (Perpinan) ដែលបានបណ្តាលឲ្យកុមារចំនួន៤នាក់បានស្លាប់។
តាមការអះអាងរបស់មន្ត្រីបារាំងបានឲ្យដឹងទៀតថា មនុស្ស២០នាក់ផ្សេងទៀតបានរងរបួស ហើយភាគច្រើននៃអ្នករងរបួសគឺមានលក្ខណៈធ្ងន់ធ្ងរ។ នេះបើតាមសារព័ត៌មាន BBC។
សិស្សដែលស្ថិតនៅលើរថយន្តដែលជួបគ្រោះថ្នាក់នេះ មានអាយុចន្លោះពី១៣ទៅ១៧ឆ្នាំ។ ទាំងអ្នកស្លាប់និងរងរបួស ត្រូវបានសមត្ថកិច្ចបញ្ជូនទៅមន្ទីរពេទ្យ។
តាមរូបភាពដែលគេចែករំលែកតគ្នា គឺរថយន្តដឹកសិស្សនោះបានក្រឡាប់ពីរជុំ ក្រោយពេលរងកម្លាំងបុកគ្នាជាមួយរថភ្លើង។
ក្រោយកើតហេតុភ្លាមក្រុមអ្នកជួយសង្គ្រោះចំនួន៧០នាក់ និងមានដាក់ឧត្ថម្ភាចក្រចំនួន៤គ្រឿងប្រចាំការដើម្បីជួយអន្តរាគមន៍។
អាជ្ញាធរថ្លែងថា រថយន្តគ្រោះថ្នាក់នោះ គឺដឹកជញ្ជូនសិស្សរៀននៅថ្នាក់អនុវិទ្យាល័យ គឺបានបើកក្នុងល្បឿន៨០គីឡូម៉ែត្រក្នុង១ម៉ោង។ នៅកន្លែងកើតហេតុនេះមានអាសធាតុល្អធម្មតា។
ក្រោយកើតហេតុភ្លាមៗនោះ នាយករដ្ឋមន្ត្រីលោក អ៊ីដូអាដ ហ្វីលីប បានទៅដល់កន្លែងកើតហេតុ ដើម្បីជួបជាមួយក្រុមគ្រួសារអ្នករងគ្រោះ។
ប្រធានាធិបតី អ៊ីម៉ាណូអែល ម៉ាក្រុន បានសរសេរសារលើ Twitter សម្តែងការសោកស្តាយចំពោះហេតុការណ៍ដែលកើតឡើង ហើយលោកជំរុញមន្ត្រីពាក់ព័ន្ធយកចិត្តទុកដាក់ឲ្យខ្ពស់ចំពោះជនរងគ្រោះនិងក្រុមគ្រួសារ៕