សមត្ថកិច្ចបានឲ្យដឹងថា ផ្ទះសម្បែងពលរដ្ឋ ១៦គ្រួសារ ត្រូវបានភ្លើងឆេះខូចខាតទាំងស្រុង នៅក្នុងហេតុការណ៍អគ្គីភ័យមួយនៅក្នុងភូមិត្រពាំងឈូក ស្ថិតក្នុងសង្កាត់ទឹកថ្លា កាលពីល្ងាចថ្ងៃម្សិលមិញនេះ ប៉ុន្តែសមត្ថកិច្ចនៅមិនទាន់ដឹងពីមូលហេតុនៃអគ្គីភ័យនេះនៅឡើយទេ។
នាយប៉ុស្តិ៍រដ្ឋបាលសង្កាត់ទឹកថ្លា ស្ថិតនៅក្នុងខណ្ឌសែនសុខ លោក សុខ សុផល បានប្រាប់VODនៅថ្ងៃនេះថា បើតាមរបាយការណ៍បឋម អគ្គីភ័យបានឆាបឆេះសំណង់មិនរៀបរយនៅតំបន់ត្រពាំងឈូក ជាតំបន់ល្បីខាងគ្រឿងញៀន កាលពីល្ងាចថ្ងៃម្សិលមិញនេះ ដោយបានបំផ្លាញផ្ទះសម្បែងពលរដ្ឋ ១៦គ្រួសារ។ ប៉ុន្តែ លោកថា ពុំមាននរណាម្នាក់រងគ្រោះថ្នាក់ដល់អាយុជីវិត ឬរងរបួសនោះទេ ខណៈទំហំនៃការខូចខាត កំពុងស្ថិតក្រោមការវាយតម្លៃពីសមត្ថកិច្ចនៅឡើយ។
អគ្គីភ័យនៅភូមិត្រពាំងឈូក បានកើតឡើងតែប៉ុន្មានម៉ោងប៉ុន្មានបន្ទាប់ពីហេតុការណ៍អគ្គីភ័យឆេះផ្ទះពលរដ្ឋមួយកន្លែងនៅក្នុងខណ្ឌដូនពេញ ដែលបណ្ដាលឲ្យកុមារតូចៗ ២នាក់ រលាកភ្លើងធ្ងន់ធ្ងរកាលពីថ្ងៃម្សិលមិញនេះ៕
