ជនជាតិចិនដល់ទៅ ១២៤នាក់ ត្រូវបានសមត្ថកិច្ចកម្ពុជាឃាត់ខ្លួននៅរាជធានីភ្នំពេញ និងនៅខេត្តបន្ទាយមានជ័យនៅក្នុងថ្ងៃនេះ ក្រោយពីរកឃើញថា បានស្នាក់នៅក្នុងប្រទេសកម្ពុជាដោយខុសច្បាប់។
ក្នុងវេបសាយអគ្គស្នងការដ្ឋាននគរបាលជាតិ ចុះផ្សាយនៅថ្ងៃនេះថា សមត្ថកិច្ចអន្តោប្រវេសន៍កម្ពុជា បានចុះត្រួតពិនិត្យការដ្ឋានសំណង់ និងកន្លែងស្នាក់នៅនៅក្នុងសង្កាត់ទួលសង្កែ ហើយបានឃាត់ខ្លួនជនជាតិ ៧៤នាក់ ក្នុងនោះជនជាតិចិន ១២នាក់ ត្រូវបានសមត្ថកិច្ចរកឃើញថា ចូលមកស្នាក់នៅក្នុងប្រទេសកម្ពុជាដោយគ្មានលិខិតឆ្លងដែន។
វេបសាយដដែល បញ្ជាក់ថា ជនជាតិទាំងនោះ ត្រូវបានបញ្ជូនទៅអគ្គនាយកដ្ឋានអន្តោប្រវេសន៍ ដើម្បីអនុវត្តនីតិវិធីបន្ត។
នៅថ្ងៃនេះដែរ កម្លាំងនគរបាលអន្តរប្រវេសន៍ខេត្តបន្ទាយមានជ័យ បានធ្វើការឃាត់ខ្លួនជនជាតិ ៥០នាក់ (មានស្ត្រី ១០នាក់) នៅច្រកទ្វារអន្តរជាតិប៉ោយប៉ែត ដើម្បីពិនិត្យឯកសារផងដែរ។ ប៉ុន្តែ រហូតមកដល់ល្ងាចថ្ងៃដដែលនេះ សមត្ថកិច្ចមិនទាន់បញ្ជាក់ថា ជនជាតិចិនទំាងនោះចូលមកទឹកដីកម្ពុជាដោយស្របច្បាប់ ឬខុសច្បាប់នៅឡើយទេ។
ប្រធាននាយកដ្ឋានស៊ើបអង្កេត និងអនុវត្តន៍នីតិវិធី នៃអគ្គនាយកដ្ឋានអន្តោប្រវេសន៍ លោក អ៊ុក ហៃសិលា បានឲ្យដឹងកាលពីសប្ដាហ៍មុនថា ជនបរទេសជិត ២ពាន់នាក់ ក្នុងចំណោម ៤៧សញ្ជាតិ ត្រូវបានបណ្ដេញចេញពីប្រទេសកម្ពុជាកាលពីឆ្នាំមុន ដោយក្នុងនោះ ភាគច្រើនជាជនជាតិវៀតណាម៕