ស្តេចអារ៉ាប់ ប៊ីសាអូឌីត គ្រោងនឹងចុះហត្ថលេខាភ្ជាប់ទំនាក់ទំនងសេដ្ឋកិច្ចជាមួយចិន ប្រមាណ៦៥ ប៊ីលានដុល្លារ ក្នុងដំណើរដែលលោកបំពេញទស្សនកិច្ចនៅចិននៅថ្ងៃព្រហស្បតិ៍នេះ ខណៈប្រទេសដែលផលិតប្រេងធំបំផុតលើពិភពលោកនេះ កំពុងផ្តោតការទំនាក់ទំនងជាមួយប្រទេសចិនជាប្រទេសសេដ្ឋកិច្ចធំលំដាប់ទី២លើពិភពលោក។
ស្តេចអារ៉ាប់ព្រះអង្គម្ចាស់ Salman bin Abdulaziz Al Saud ដែលមានវ័យជាង៨០ព្រះវស្សា បានបង្ហាញពីមហិច្ឆតា ក្នុងការធ្វើកំណែទម្រង់សេដ្ឋកិច្ចជាង២ឆ្នាំមកនេះ។ ព្រះអង្គបានទៅបំពេញទស្សនកិច្ចនៅប្រទេសផ្សេងៗជាច្រើនដែលបាននាំប្រេងពីប្រទេសអារ៉ាប់ ហើយបានជួយជំរុញក្នុងការផ្តល់ឱកាសវិនិយោគនៅក្នុងប្រទេសទាំងនេះ រួមទាំងការលក់ភាគហ៊ុនក្រុមហ៊ុនយក្ស Saudi Aramco។
អារ៉ាប់ប៊ីសាអូឌីត ជំរុញទីផ្សារលក់ប្រេងទៅកាន់ប្រទេសចិន ជាប្រទេសទីផ្សារលំដាប់ទី២ បន្ទាប់ពីការបាត់បង់ទីផ្សារនៅប្រទេសរុស្ស៊ីកាលពីឆ្នាំមុន ហើយអារ៉ាប់ប្រឹងប្រែងធ្វើការងារខ្លាំងក្នុងការទំនាក់ទំនងជាមួយក្រុមហ៊ុនប្រេងរបស់ចិន។
ប្រធានាធិបតីចិន លោក ស៊ី ជីនពីង បានថ្លែងប្រាប់ស្តេចអារ៉ាប់នៅទីក្រុងប៉េកាំងថា ជាការផ្តល់កិត្តិយសដល់ប្រជាជនចិនដែលបានព្រះអង្គធ្វើដំណើរទស្សកិច្ច ហើយក៏ជាការភ្ជាប់នូវការរឹតចំណងនៃការទំនាក់ទំនងផងដែរ។
អនុរដ្ឋមន្ត្រីការបរទេសចិនលោក Zhang Ming ថ្លែងថា អនុស្សរណៈនៃការយោគយល់គ្នា នឹងចុះហត្ថលេខាលើទឹកប្រាក់ប្រមាណ៦៥ប៊ីលានដុល្លារ ទាក់ទងនឹងវិស័យថាមពល ប៉ុន្តែលោកមិនទាន់ផ្តល់ព័ត៌មានលម្អិតនោះទេ៕