គណបក្សប្រឆាំងការពារថា ការធ្វើសមាជវិសាមញ្ញកែទម្រង់ក្បាលម៉ាស៊ីដឹកនាំរបស់បក្សសម្រាប់ត្រៀមខ្លួនប្រកួតការបោះឆ្នោតនោះ បានធ្វើឡើងតាមទម្រង់ច្បាប់ ខណៈរដ្ឋាភិបាលបង្ហាញមិនច្បាស់លាស់ពីការផ្តល់សុពលភាព ដោយថាសមាជនោះធ្វើខុសលក្ខន្តិកៈ។
កាលពីថ្ងៃទី១៤ មីនា រដ្ឋមន្ត្រីក្រសួងមមាផ្ទៃ លោក ស ខេង ថ្លែងក្នុងពិធីសម្ពោធផ្លូវមួយខ្សែរ នៅខេត្តកំពង់ស្ពឺថា ក្រសួងជំនាញរបស់លោកទំនងមានការលំបាកក្នុងការផ្ដល់សុពលភាពដល់សមាសភាពក្បាលម៉ាស៊ីនថ្មីរបស់គណបក្សសង្គ្រោះជាតិ ដោយថាគណបក្សនោះបានធ្វើខុសពីលក្ខន្តិកៈគណបក្ស។
មួយថ្ងៃបន្ទាប់ ពោលគឺនៅថ្ងៃទី១៥ខែមីនា អនុប្រធានគណបក្សសង្គ្រោះជាតិ លោក អេង ឆៃអ៊ាង បានប្រើប្រាស់បណ្តាញសង្គមប្រកាសថា សមាជរបស់ខ្លួនកាលពីថ្ងៃទី២មីនានោះថា បានធ្វើឡើងតាមលក្ខន្តិកៈរបស់គណបក្សត្រឹមត្រូវ។
លោក អេង ឆៃអ៊ាង បានពន្យល់ថា សមាជគណបក្សមានពីរប្រភេទ គឺសមាជសមញ្ញនិងវិសមញ្ញ។ លោកថាសមាជសមញ្ញធ្វើ៥ឆ្នាំម្តង និងវិសមញ្ញធ្វើឡើងក្នុងករណីចំបាច់ តាមការស្នើសុំពីប្រធានគណបក្ស ឬពីសំឡេង២ភាគ៣នៃគណៈកម្មាធិការអចិន្ត្រៃយគណបក្ស ឬ២ភាគ៣នៃគណៈកម្មការនាយក។
លោក អេង ឆៃអ៊ាង ឲ្យដឹងទៀតថា យោងតាមប្រកា២១នៃលក្ខន្តិកៈ គណៈកម្មាធិការអចិន្ត្រៃយគណបក្សបានកោះប្រជុំសមាជវិសាមញ្ញនៅថ្ងៃទី២ខែមីនា។ លោកបន្តថាសមាជនោះ មានការគាំទ្រដោយគណៈកម្មការនាយក ដោយសំឡេងលើសពី២ភាគ៣ ទើបសមាជបានពិនិត្យនិងអនុម័តធ្វើវិសោធនកម្មលក្ខន្តិកៈប្រការ៤៥និងប្រការ៤៧។
បើតាមលោក អេង ឆៃអ៊ាង សមាជពេលនោះ បានផ្តល់សេចក្តីទុកចិត្តទៅលើលោក កឹម សុខា ឲ្យធ្វើជាប្រធានបក្ស លោក ប៉ុល ហំម លោកស្រី មួរ សុខហួរ និងរូបលោកធ្វើជាអនុប្រធានបក្ស។
លោកថា៖ «ដូច្នេះខ្ញុំសូមជម្រាបជូនជាថ្មីម្តងទៀតថា សមាជវិសមញ្ញ របស់គណបក្សថ្ងៃទី២ខែមីនាដែលយើងបានរៀបចំធ្វើកន្លងមកនេះ ស្របតាមលក្ខន្តិកៈរបស់គណបក្សហើយថ្នាក់ដឹកនាំជាន់ខ្ពស់ របស់គណបក្សដែលអនុម័តដោយសមាជវិសមញ្ញ កាលពីថ្ងៃទី២ខែមីនាកន្លងមកនេះ ក៏ស្របនឹងលក្ខន្តិកៈផងដែរ»។
អ្នកនាំពាក្យក្រសួងមហាផ្ទៃលោក ខៀវ សុភ័គ អះអាងថា មកដល់ពេលនេះ ក្រសួងមិនទាន់សម្រេចផ្តល់សុពលភាពឲ្យគណបក្សសង្គ្រោះជាតិនៅឡើយទេ ដោយថា មន្ត្រីជំនាញកំពុងពិនិត្យ។
ប៉ុន្តែលោក អះអាងថា ជាទស្សនផ្ទាល់ខ្លួន សមាជនោះនៅតែប្រាស់ចាកពីលក្ខន្តិកៈរបស់គណបក្ស ដោយថាបើពិនិត្យទៅលើឯកសារដែល លោក សម រង្ស៊ី បានតម្កល់ទុកនៅក្រសួងមហាផ្ទៃ។
លោកថា៖ «ជារួមយើងគ្មានអីចេះជាងគេទេ បើគេថាត្រូវៗហើយ ព្រោះវាជាលក្ខន្តិកៈរបស់គេ។ប៉ុន្តែ[ខ្ញុំនិយាយ]ក្នុងនាមជាអ្នកអព្យាក្រិតទៅវិញទេ នៅក្នុងប្រការ២១នេះគឺប្រការ២១នេះ គឺសមាជមាន២ប្រភេទ គឺសមាជសមញ្ញយ៉ាងម៉េច និងវិសមញ្ញយ៉ាងម៉េច។ ប្រការ២១ដដែលហ្នឹង[សរសេរថា]គណៈកម្មាធិការអចិន្ត្រៃយ៍គណបក្សមានភារកិច្ចកោះប្រជុំសមាជវិសមញ្ញ ឬសមញ្ញ ហើយសមាជទាំងពីរប្រភេទនេះ ត្រូវតែប្រារព្ធឡើង ក្រោមអធិបតីភាពប្រធានបក្ស បានសេចក្តីថាម៉េច ត្រូវតែប្រារព្ធឡើងក្រោមអធិតីភាពឯកឧត្តមប្រធាន សម រង្ស៊ី ។ហើយយើងសួរទៅវិញ នៅពេលបើកសមាជហ្នឹង សម រង្ស៊ី គាត់នៅដែរឬក៏អត់ គាត់មានមកសមាជឬក៏អត់ អញ្ចឹងខុសតាំងពីដំបូងរួចបាត់ទៅហើយ»។
យ៉ាងណាក៏ដោយសមាជិកសម្ព័ន្ធកំណែទម្រង់ការបោះឆ្នោត លោក យង់ គិមអេង លើកឡើងថា គណបក្សសង្គ្រោះជាតិមិនគួរមានបញ្ហាពីការចុះបញ្ជីគណបក្ស ឬផ្តល់សុពលភាពនេះទេ ដោយលោកថា លោក សម រង្ស៊ី បានប្រកាសលាលែងពីប្រធានគណបក្សជាផ្លូវការរួចហើយ ។ លោកថា សមាជវិសមញ្ញនោះទៀតសោត លោក សម រង្ស៊ី ក៏មិនបានប្តឹងផ្តល់ករណីនេះមកស្រួងមហាផ្ទៃដែរ។
អ្នកឃ្លាំមើលការបោះឆ្នោតរូបនោះ ជំរុញឲ្យក្រសួងមហាផ្ទៃធ្វើការឈរលើគោលការឯករាជ្យ បង្កលក្ខណៈងាយស្រួលឲ្យគណបក្សនយោបាយ នានាបានចុះឈ្មោះចូលរួមប្រកួតប្រជែងស្របតាមលក្ខណៈច្បាប់ដោយតម្លាភាព ជាជាងប្រើតួនាទី បង្កការលំបាក ដល់គណបក្សដទៃដែលខ្លួនមិនគាំទ្រ៕
