នាយករដ្ឋមន្ត្រីកម្ពុជា លោក ហ៊ុន សែន ថ្លែងបែបឌឺដង ទៅអតីតមេដឹកនាំបក្សប្រឆាំងលោក សម រង្ស៊ី ថា គ្មានទេការដាក់សម្ពាធពីប្រទេសអូស្ត្រាលីពាក់ព័ន្ធនឹងបញ្ហានយោបាយនៅកម្ពុជាមានតែផ្តល់ជំនួយជិត៩០លានដុល្លារអូស្ត្រាលី។
នៅថ្ងៃសុក្រនេះ លោក ហ៊ុន សែន បានទៅដល់ប្រទេសអូស្ត្រាលី ដើម្បីចូលរួមកិច្ចប្រជុំកំពូលអាស៊ាន-អូស្ត្រាលី ដែលគ្រោងធ្វើនៅថ្ងៃទី១៧និង១៨ខែមីនានេះ។
លោក ហ៊ុន សែន ក្នុងពិធីជួបសំណេះសំណាលជាមួយខ្មែរនៅប្រទេសអូស្ត្រាលីនាថ្ងៃនេះ បានថ្លែងថា ក្នុងជំនួបទ្វេភាគី ជាមួយ នាយករដ្ឋមន្ត្រីអូស្ត្រាលី លោកថា អូស្ត្រាលី មិនបានដាក់សម្ពាធណាមួយពីបញ្ហានយោបាយនៅកម្ពុជាដូចដែលមេបក្សខ្លះធ្លាប់លើកឡើងនោះទេ។ លោកថា អូស្ត្រាលី បានសន្យាផ្តល់ជំនួយដល់កម្ពុជាចំនួន៨៧លានដុល្លារអូស្ត្រាលី។
កាលពីសប្តាហ៍មុន លោក សម រង្ស៊ី បានផ្តល់បទសម្ភាសជាមួយកាសែតបរទេសអំឡុងលោកជួបពលរដ្ឋខ្មែរនៅអូស្រ្តាលី ដោយអំពាវនាវឲ្យរដ្ឋាភិបាលអូស្ត្រាលី ជំរុញបញ្ហាប្រជាធិបតេយ្យ ដល់រដ្ឋាភិបាលកម្ពុជា ដែលដឹកនាំដោយ លោក ហ៊ុន សែន ពេលលោកមកចូលរួមប្រជុំកំពូលអាស៊ានៅប្រទេសនេះ។
ប៉ុន្តែ នាយករដ្ឋមន្ត្រីកម្ពុជា លោក ហ៊ុន សែន បានព្រមានទុកមុនថា បើអូស្ត្រាលី ហ៊ានដាក់សម្ពាធកម្ពុជា ដូចការលើកឡើងមែនលោកថា អូស្រ្តាលីនឹងបរាជ័យកិច្ចប្រជុំសកំពូលនេះ ដោយថា អាស៊ានត្រូវការសមាជិកទាំងអស់រួមទាំងកម្ពុជាផងគាំទ្រ ទើបអាចចេញសេចក្តីថ្លែងការរួមបាន៕
